Դատախազը միջնորդեց 3 ամսով երկարաձգել քաղբանտարկյալ Վարդան Ղուկասյանի խափանման միջոց կալանքը

Հակակոռուպցիոն դատարանում քննվում է Գյումրիի գործող  քաղաքապետ, քաղաքական բանտարկյալ Վարդան Ղուկասյանի խափանման միջոցի հարցը: Հանրային մեղադրողը միջնորդեց ևս երեք ամսով երկարաձգել խափանման միջոց կալանքը։  

«Քրեական  վարույթով ապացուցման գործընթացի միջամտելու ռիսկը դեռևս առկա է, քանի դեռ քրեական  վարույթով մեղադրանքի հիմքում դրված բոլոր ապացույցները չեն հետազոտվել։

Բացի այդ, Դատալեքս տեղեկատվական հարթակի ուսումնասիրությունից կարող ենք արձանագրել, որ կիրառված խափանման միջոցի գործողության ընթացքում որպես այդպիսին Վարդան Ղուկասյանի վերաբերյալ նոր քրեական վարույթ է մեղադրական եզրակացությամբ ուղարկվել դատարան, ընդ որում այդ արարքը կատարվել է  կիրառված խափանման միջոցի ընթացքում։

Մեղադրանքի կողմը չի կարող այս հանգամանքն անտեսվել և հաշվի չառնվել։

Առկա է նաև նոր հանցանք կատարելու հիմք»,- ասաց հանրային մեղադրողը։

Ըստ մեղադրական եզրակացության. «Վարդան Ղուկասյանը մեղադրվում է այն բանում, որ նա, հանդիսանալով Գյումրի համայնքի ղեկավար, նույն համայնքի գլխավոր ճարտարապետի պաշտոնը զբաղեցրած անձի՝ Հենրիկ Գասպարյանի հետ Սևակ Գոմցյանի օգտին հովանավորչության, թողտվության և այլ ապօրինի գործողության համար պահանջել է խոշոր չափերով՝ 4․000․000 (չորս միլիոն) ՀՀ դրամ կաշառք գումար, ինչպես նաև մի խումբ պաշտոնատար անձանց հետ նախնական համաձայնությամբ կատարել է պաշտոնական կեղծիք»:

Իհարկե, փաշինյանական ռեժիմը չէր կարող պարզապես քինախնդրություն դրսևորել՝ Գյումրիում կրած պարտության համար: Նրանց քիչ է թվում, որ Վարդան Ղուկասյանին՝ գործող քաղաքապետին ազատությունից արհեստականորեն զրկել են, իսկ երկրի երկրորդ խոշոր քաղաքի կառավարման համար ստեղծել որոշակի դժվարություններ: Փաշինյանական ռեժիմը մի հատ էլ այնպիսի մեղադրանք է մոգոնել, որ սթափ դատող ցանկացած մարդու համար ուղղակի ծիծաղելի է. ուրեմն, Վարդան Ղուկասյանի «ձեռքը քարի տա՞կ էր մնացել», և նա ինչ-որ մեկից 4 միլիոն դրամ կաշա՞ռք պիտի պահանջեր՝ մոհ 10 հազար ԱՄՆ դոլար: Զավեշտ է սա, նույնիսկ վիրավորական՝ հաշխվի առնելով, թե ով ինչի մեջ է մեղադրվում: