Ռուսաստանն այլևս քաղաքական առևտրի չի գնում Նիկոլ Փաշինյանի հետ. Քաղտեխնոլոգ

Քաղտեխնոլոգ Արմեն Բադալյանը պատահական չի համարում Նիկոլ Փաշինյանի՝ Եկատերինբուրգ գնալու օրը Գագիկ Ծառուկյանի տան խուզարկությունները, նրան ձերբակալելը, ապա նաև կալանավորելը։

«Գագիկ Ծառուկյանի անունը որպես քաղհալածյալ առաջին անգամ նշվեց երկու շաբաթ առաջ «Միացյալ Ռուսաստան» կուսակցության համագումարում այդ կուսակցության նախագահ, Ռուսաստանի նախկին նախագահ, այժմ Անվտանգության խորհրդի քարտուղար Դմիտրի Մեդվեդևի կողմից։ Եվ մեծ է հավանականությունը, որ Հայաստանի իշխանությունները որոշեցին այդ հարցը խաղարկել՝ խուզարկել, կալանավորել Ծառուկյանին, հետո նույն օրը գնալ Միշուստինի հետ հանդիպման։ Միգուցե նման հաշվարկ կա, կգնար, կբանակցեր՝ հանո՞ւմ եք պատժամիջոցները, պրոռուսական քաղաքական գործչին բաց կթողնեմ։ Չէ, բաց չեմ թողնի»,-Panorama.am-ի հետ զրույցում ասաց քաղտեխնոլոգը՝ անդրադառնալով ԲՀԿ առաջնորդ, գործարար, բարերար Գագիկ Ծառուկյանի նկատմամբ իրականացվող հետապնդումներին։
Նրա խոսքով, Նիկոլ Փաշինյանը սակայն մի բան հաշվի չէր առել, Ռուսաստանի Դաշնությունը վերջնականպաես է որոշել կապերը խզել այսօրվա իշխանությունների հետ և շատ ավելի խիստ են դրել ԵՄ-ից տարանջատման հարցը, քաղաքական առևտրի այլևս չեն գնում։
«Եթե քաղաքական առևտրի գնացող լինեին, ապա առնվազն հունիսի 7-ից հետո պատժամիջոցներ, սահմանափակումներ չէին լինի Հայաստանի նկատմամբ։ Այ սա է, որ չեն կարողանում հասկանալ բարձրաստիճան պաշտոնյաները։ Իրենց թվում է՝ հեսա վարչապետը կգնա, հարցերը կլուծի։ Չէ, չի լուծի, որովհետև արդեն հստակ երևում է, որ ռուսներն իրենց պլան Բ-ն իրականացնում են, Հայաստանին հյուծելու քաղաքականություն են վարում։ Ոչ ոք չգիտի, թե ո՞րն է  հաջորդ քայլը լինելու, կարող է խստացվեն սահմանափակումները, հնարավոր է արդյունաբերական ապրանքների վրա կիրառվեն, Ռուսաստանից Հայաստան եկող ֆինանսական հոսքերը խաթարվեն»,-նշեց Արմեն Բադալյանը։

Նրա խոսքով, չնայած Հայաստանը թերահավատ է ԵԱՏՄ-ից իրեն դուրս հանելու հարցում, բայց չի բացառվում, որ Ռուսաստանը կգնա այդ քայլին, հնարավոր է նախ կասեցվի Հայաստանի անդամակցությունը տնտեսական այդ միությանը։

«Դա կատարվելու դեկտեմբերին։ Ո՞վ ասեց, որ դեկտեմբերին վարչապետին թույլ կտան ընդհանրապես Մոսկվա գնալ։ Մի մոռացեք, որ գործող վարչապետ Նիկոլ Փաշինյանի լիազորություններն ավարտվում են օգոստոսի 2-ին։ Սա այն վարչապետն է, որն ընտրվել է 2021 թվականին, որին Ռուսաստանն ընդունել է որպես լեգիտիմ ղեկավար։ Ինչ վերաբերում է օգոստոսի 3-ին կայանալիք ԱԺ նիստին, երբ առաջադրվի վարչապետի թեկնածու, ո՞վ ասաց, որ Նիկոլ Փաշինյանին կընդունե՞ն որպես դե ֆակտո ղեկավար։ Այս պահին Ռուսաստանը չի շնորհավորել Նիկոլ Փաշինյանին, չշնորհավորել, նշանակում է չճանաչել, իսկ դա նշանակում է, որ դու չունես իրավական լիազորություններ որևէ բան իրականացնելու։ Նրան կարող են ուղղակի չթողնել գնալ Մոսկվա կամ Մինսկ, քանի որ Ռուսաստանը հստակ պահանջ է դրել՝ ԵՄ-ի հետ կապերի խզում, այսինքն, նա կարող է առևտուր անել, բայց ոչ Ռուսաստանի հաշվին։ Ռուսաստանն ասում է, քո ժողովուրդը արևմտամե՞տ է, գնա, հանրաքվե արա, եթե ժողովուրդը կողմ է ԵՄ անդամակցությանը, խնդիր չկա, քեզ հետ վարվենք այնպես,  ինչպես Հունաստանի կամ արևմտյան այլ երկրի ղեկավարի հետ ենք վարվում։ Եթե քո ժողովուրդը դեմ է, դու պետք է գաս ԵԱՏՄ, բայց դա էլ չես կարող անել, քանի որ ԵՄ-ն արդեն շատ բաներ ջրի երես կհանի։ Այս իշխանությունը  չի ցանկանում հանրաքվե անել՝ շատ լավ հասկանալով այս ամենը»,-մանրամասնեց Արմեն Բադալյանը։

Նրա գնահատմամբ, այս հարցում Ռուսաստանը բավականին լուրջ է տրամադրված, քանի որ շատ լավ հասկանում է, որ Հայաստանի իշխանությունների հաջորդ քայլը Հայաստանի Ռուսաստանի ռազմաքաղաքական, ռազմատնտեսական ներկայության զրոյացումն է լինելու, քանի որ Հայաստանը ԵՄ ծրագրերն է իրականացնում։

«Դրա համար հետ ողորմեայի մի սպասեք այս պահի դրությամբ, իհարկե, տեսական 1 տոկոսի հավանականություն կա դրա համար, բայց այս պահի դրությամբ ռուսական կողմը չորով դնելու է պահանջները։ Մի մոռացեք, որ 800 հազար մարդ ապրում  ու աշխատում է Ռուսաստանում, չկա ոչ մի երաշխիք, որը վաղը նրանց չեն վտարի Հայաստան։ Դուք պատկերացրեք, օրինակ, մարդը 15 տարի ապրել է Կրասնոդարում կամ Մոսկվայում, ունի մեծ տուն, այգի, գույք, հիմա նրան հանում են, ասում են՝ ճամպրուկներդ վերցրու, գնա։ Պատկերացնո՞ւմ եք նրա դիրքորոշումը Հայաստանի իշխանությունների նկատմամբ»,-նշեց Ա. Բադալյանը։