Իսրայելի կառավարությունը կասեցրել է Հայոց ցեղասպանությունը ճանաչելու նախաձեռնությունը

Իսրայելի խորհրդարանում Օսմանյան կայսրության կողմից Առաջին համաշխարհային պատերազմի տարիներին հայերի նկատմամբ իրականացված բռնությունները որպես ցեղասպանություն ճանաչելու վերաբերյալ նախատեսված կարևոր քվեարկությունը կասեցվել է։ Այս մասին հայտնում են իսրայելական լրատվամիջոցները։

Քվեարկության հետաձգումը տեղի է ունենում տարածաշրջանային լարվածության ֆոնին, երբ Իրանի հետ հրադադարը խախտվել է Պարսից ծոցում շարունակվող հարձակումների պատճառով։ Այն նաև հաջորդում է Թուրքիայում անցկացված ՆԱՏՕ-ի գագաթնաժողովին, որի ընթացքում Անկարան ԱՄՆ նախագահ Դոնալդ Թրամփին կոչ էր արել հաստատել ամերիկյան F-35 կործանիչների վաճառքը։
Անցյալ ամիս Իսրայելի կաբինետը միաձայն հավանություն էր տվել հայերի նկատմամբ իրականացված բռնությունները որպես ցեղասպանություն որակելու առաջարկին, սակայն Քնեսեթում նախատեսված վերջնական քվեարկությունը, JNS-ի տեղեկություններով, կասեցվել է։ Խորհրդարանը շաբաթվա վերջում անցնում է ամառային արձակուրդի և աշխատանքը կվերսկսի միայն հոկտեմբերի 27-ի համապետական ընտրություններից հետո։

Իսրայելը նախկինում խուսափել էր պաշտոնապես ճանաչել Հայոց ցեղասպանությունը, սակայն Թուրքիայի հետ հարաբերությունների վատթարացման պայմաններում հարցը կրկին հայտնվել էր օրակարգում։ Վարչապետ Բենիամին Նեթանյահուն նախկինում հայերի նկատմամբ իրականացված բռնությունները բնութագրել է որպես ցեղասպանություն, սակայն մինչ օրս այդ հարցով խորհրդարանական պաշտոնական քվեարկություն չի անցկացվել։

Թուրքիան, որը Գազայի պատերազմի ընթացքում դարձել է Իսրայելի ամենախիստ քննադատներից մեկը, կաբինետի որոշումը բնութագրել է որպես քաղաքական դրդապատճառներով պայմանավորված։ Միևնույն ժամանակ, Ադրբեջանը դատապարտել է Իսրայելի կաբինետի քայլը և կոչ արել հրաժարվել այդ որոշումից՝ ընդգծելով իր հավասարակշռված հարաբերությունները թե՛ Թուրքիայի, թե՛ Իսրայելի հետ։ Բաքուն շարունակում է մնալ Երուսաղեմի կարևոր ռազմավարական գործընկերը՝ անվտանգության և էներգետիկայի ոլորտներում սերտ համագործակցության շնորհիվ։
Աղբյուրը` Panorama.am