«Գազանացել ա ժողովուրդը»․ օրը ցերեկով կրակոցներ ու դաժան ծեծ՝ Երևանի բակում

Վարդավառի տոնին, երբ մայրաքաղաքում տոնական տրամադրություն էր, Երևանի Արաբկիր վարչական շրջանի Վաղարշյան փողոցի 24/6 բնակելի շենքի բակում վիճաբանությունը վերածվել է ծեծկռտուքի և կրակոցների։ Դեպքի հետևանքով երկու քաղաքացի մարմնական վնասվածքներով տեղափոխվել են հիվանդանոց։

NEWS.am-ի հետ զրույցում բնակիչները պատմել են, որ նախ լսել են վիճաբանության ձայներ, ապա՝ մի քանի կրակոց։ Նրանց խոսքով՝ միջադեպի մասնակիցներն իրենց բակի բնակիչները չեն եղել։

«Կրակոցի ձայներ լսեցի, դուրս եկա, տեսա՝ իրար են ծեծում, հետո 4-5 կրակոց եղավ»,- պատմել է ականատես բնակիչներից մեկը։

Ականատեսներից մեկը նշել է, որ մի խումբ տղամարդիկ դաժանորեն ծեծել են մեկ անձի՝ շարունակելով հարվածել նույնիսկ այն ժամանակ, երբ նա արդեն ընկած էր գետնին։

Մեկ այլ բնակչի խոսքով՝ վիրավորված տղամարդը, չնայած վնասվածքներին, ինքնուրույն նստել է մեքենան և հեռացել՝ հրաժարվելով շտապօգնության օգնությունից։ Բնակիչներն ասում են՝ դեպքից ընդամենը մի քանի րոպե առաջ նույն վայրում երեխաներ էին խաղում, իսկ ոստիկանները դեպքից հետո տարածքից պարկուճներ էին հավաքում։

Քննչական կոմիտեից հայտնում են, որ նախաձեռնվել է քրեական վարույթ՝ սպանության փորձի, խուլիգանության և հրազենի ապօրինի շրջանառության հատկանիշներով։ Մեկ անձ ձերբակալվել է, իսկ վիճաբանության պատճառները դեռևս հայտնի չեն։