Ռոզա Ծառուկյանի առողջական վիճակը վատացել է ՔԿ հրապարակած տեսանյութից հետո, դրա մասին նա ավելի ուշ է տեղեկացել. Իվետա Տոնոյան

Հարցին՝ այս պահին նա տա՞նն է, թե՞ հիվանդանոցում, Իվետա Տոնոյանը պատասխանեց, որ  մանրամասներին չի տիրապետում, պարզապես կարողացել է ճշտել, որ նրա ինքնազգացողությունն այս պահին լավ է։

«Կարծում եմ՝ սա այն դեպքն է, երբ օտար մարդն անգամ, այդ տեսանյութը դիտելուց հետո, չէր կարող չունենալ բացասական էմոցիաներ ու հույզեր։ Այս դեպքում, երբ խոսում ենք ԲՀԿ առաջնորդի մայրիկի մասին, բնական է հոգեվիճակն ու ապրումները, որի մեջ հայտնվել է 93-ամյա Ռոզա Ծառուկյանը։ Կոնկրետ այս դեպքում հատվել են կարմիր գծեր, խախտվել են չգրված օրենքներ, խոսքը վերաբերում է  տան, ընտանիքի, օջախի անձեռնմխելիության իրավունքին, որը, ցավոք, խախտվել է։ Այլ մանրամասների չեմ տիրապետում»,- հավելեց Իվետա Տոնոյանը։

Նրանից նաև հետաքրքրվեցինք, թե Գագիկ Ծառուկյանի առանձնատան խուզարկության ժամանակ որտե՞ղ են եղել այդ պահին առանձնատանը գտնվող Գագիկ Ծառուկյանի տիկինն ու մայրը, տարբեր տեղեկություններ են տարածվում, որ նրանք ամբողջ խուզարկության ընթացքում ստիպված են եղել մնալ սենյակներում՝ չկարողանալավ առանձնատանն ազատ տեղաշարժվել,  Իվետա Տոնոյանը պատասխանեց.

«Տեղեկատվության չեմ տիրապետում, այդ մասին խոսելու առիթ չի եղել, իսկ ընթացքի վերաբերյալ բոլորն էլ գիտեն, թե որքան սահմանափակ էր, անգամ փաստաբանները ժամեր անց են կարողացել մուտք գործել առանձնատուն։ Այդ մասով խոսելու առիթ դեռ չի եղել, այնպես որ, չեմ կարող մեկնաբանել»։

Հիշեցնենք, որ հուլիսի 6-ին, գրեթե 13 ժամ շարունակ ԱԱԾ դիմակավորված ու զինված ծառայողները վերահսկողության տակ էին վերցրել «Բարգավաճ Հայաստան» կուսակցության առաջնորդ Գագիկ Ծառուկյանի առանձնատունը, իսկ առանձնատան ներսում քննիչները խուզարկություն էին իրականացնում։ Առանձնատանը զուգահեռ՝ խուզարկություններ էին իրականացվում Գագիկ Ծառուկյանի ընտանիքին պատկանող ընկերություններում, մի քանի ընկերությունների դռներ կապարակնքվել են։

Խուզարկություններից հետո ԱԱԾ-ականները Գագիկ Ծառուկյանին ձերբակալեցին ու առանձնատնից տեղափոխեցին նախ՝ Քննչական կոմիտե, այնուհետև միջնորդություն ներկայացվեց դատարան՝ կալանավորելու վերաբերյալ, որից հետո նա 2 ամսով կալանավորվեց։

Քննչական կոմիտեից դուրս գալուց հետո Գագիկ Ծառուկյանն այս գործողությունների վերաբերյալ հակիրճ ասել էր.

«Մեղադրանքը լրիվ սարքած է, սուտ, փուչիկ է, 100 տոկոսով ճիշտ բան չկա, ամեն ինչ պարզ կլինի»։

Ըստ Քննչական կոմիտեի տարածած հաղորդագրության, տնտեսական հանցագործությունների և մաքսանենգությունների քննության գլխավոր վարչությունում քննվող քրեական վարույթներից մեկով փաստական տվյալներ են ձեռք բերվել այն մասին, որ Գ.Ծ.-ի կազմակերպմամբ մի շարք անձինք 2022-2024 թվականների ընթացքում առերևույթ կատարել են առանձնապես խոշոր չափերով խարդախություն և առանձնապես խոշոր չափերով փողերի լվացում։

Ի դեպ, Գագիկ Ծառուկյանի առանձնատան խուզարկությունից հետո ՔԿ-ն տեսանյութ տարածեց, որում ներկայացնում էր, թե ինչպես են դիմակավորված ու զինված ԱԱԾ-ականները ներխուժում առանձնատուն  և գետնին գցում Գագիկ Ծառուկյանին, ով նրանց ընդառաջ է գալիս՝ առանց դիմադրություն ցույց տալու։

Հիշեցնենք նաև, որ դեռևս մայիսի 26-ին լրագրողների հետ հանդիպման ժամանակ Գագիկ Ծառուկյանն ասել էր, որ ինքն անձնական որևէ շահ չունի, ամեն ինչ երկրի համար է անում և պարզ ու հստակ ասել է իր մոտեցումները։

«Ես շատ հանգիստ եմ, կարևորը՝ տանը զգուշացրել եմ, ամենակարևորը, թանկը ինձ համար մայրս է, ասել եմ՝ բաբո ջան, ժամանակավոր բան է լինելու, հանկարծ չնեղվես, կարող է գնամ քննության, 1-2 ամիս ժամանակավոր բան լինի, ռեալ բան չենք արել, որ դրա համար մարդուն եսիմինչեր անեն։ Եթե ուզում են ինձ հերոսացնեն, ես շատ ուրախ եմ»։