Իրանցի գեներալ. Թուրքիայի օկուպացիոն զորքերը պետք է դուրս գան Սիրիայի տարածքից

Թուրքական ներխուժումը Սիրիա հակասական դարձրեց նրա հարաբերությունները՝ Մոսկվայի և Թեհրանի հետ: Մի կողմից այս երեք երկրները ունեն ընդհանուր նպատակ՝ դուրս մղել Միացյալ Նահանգներին՝ Սիրիայից, սակայն մյուս կողմից երբ թուրքական զորքը ներխուժեց Հյուսիսային Սիրիա, Մոսկվան, և հատկապես՝ Թեհրանը, Թուրքիայի այդ քայլին նյարդային արձագանք տվեցին: Իսկ վերջերս Աֆրինի քրդերին օգնության եկան Ասադի կողմնակիցները, որոնց հիմնականում կոորդինացնում են իրանցի ռազմական խորհրդատուները: Անկարայի արձագանքը չուշացավ: Էրդողանը հեռախոսազրույց ունեցավ Պուտինի և Ռոհանիի հետ: Սակայն այս ամենի արդյունքում, ի տարբերություն Մոսկվայի, Թեհրանի դիրքորոշումը չփոխվեց: Եթե ռուս գեներալները նշում են, որ ըմբռնումով են մոտենում Թուրքիայի զինված ուժերի օպերացիային Հյուսիսային Սիրիայում, ապա պարսիկների արձագանքը այլ է, մասնավորապես, իրանցի գեներալ Սաֆավին, ով նաև Իրանի կրոնական առաջնորդ Համենեի ռազմական խորհրդատուն է, հայտարարեց, որ Թուրքիան պետք է դուրս բերի իր զորքերը Հյուսիսային Սիրիայից, քանզի եթե սիրիական և թուրքական զորքերն իրար հետ բախվեն, ապա դժվար թե Իրանը կարողանա իր չեզոքությունը պահել այս հարցում: 

Հիշեցնենք, որ մինչ այս պահը Թուրքիան արդեն օկուպացրել է 750 կմ քառակուսի տարածք, գրավել ավելի քան 150 քրդաբնակ գյուղ, և ընդամենը 5 կմ-ի հեռավորությամբ է կանգնած Աֆրին քաղաքի դիմաց:

Zham.am