Իրանի քաղաքացին ասում է՝ Ծառուկյանն ինձ չի խաբել, մեկ այլ անձ է ինձ խաբել, իրենք ասում են չէ՝ Ծառուկյանն է խաբել. Պաշտպան

«Ընդհանրապես,  հանցագործության մասին խոսք չկա։ Այս ամենը կատարվում է  զուտ մեկ բանի համար՝ Գագիկ Ծառուկյանին բերել դատարան և ունենալ կալանքի որոշում»,- դատարանում ԲՀԿ առաջնորդ Գագիկ Ծառուկյանի կալանքի միջնորդության քննության ավարտից հետո լրագրողներին ասացին պաշտպանները։

Պաշտպաններից Երեմ Սարգսյանը մանրամասնեց. «Իրենք ինչ են ասում. իբրև թե  Գագիկ Ծառուկյանը Իրանի որոշ քաղաքացիներից հափշտակություն է արել, փողերի լվացում կատարել։ Դատարանում հստակ հիմնավորեցինք, որ այդ  անձիք փաստաթղթեր են ստորագրել, իրենք են պարտք պարոն Ծառուկյանին, իրենք պարտավորվել են մինչև 2026 թվականը վերադարձնել, բայց չեն վերադարձրել և այս վարույթները, ըստ էության, շանտաժի հետ կապված սկսել են։  

Մենք հիմնավորեցինք, որ Իրանի դատարանում էլ նույն պրոցեսն է գնում, Իրանի դատարանն արձանագրել է, որ հանցագործություն չկա, քաղաքացիաիրավական  գործընթացներ են, համապատասխան իրենց  իրավասու պետական մարմիններն արձանագրել են, որ Իրանի քաղաքացիների հայտարարծաների հիմնական մասը չի համապատասխանել իրականությանը։

Այն, ինչ ներկայացնում են, ակնհայտ է՝ հանցագործություն ընդհանրապես գոյություն չունի։

Ասում են՝ որոշակի  ընկերությանը պատկանող գույքը հափաշտակել են խարդախությամբ։ Հարցնում ենք՝ այդ գույքը հիմա ո՞ւմ է  պատկանում։ Ասում են նույն ընկերությանը։ Ասում ենք՝ այդ ընկերության գույքն է, ո՞նց են հափշտակել, ասում են՝ դե հափշակվել է։ Հափշտականությունն ու խարդախությունն այն է, որ դու այդ ընկերության, անձի սեփականությունը դարձնում ես քոնը։

Բայց այդ, գույքը հիմա պատկանում է այդ ընկերությանը, որի 50 տոկոս սեփականատերը Իրանի քաղաքացին է։

Մյուս դրվագով Իրանի քաղաքացին ասում է՝ Ծառուկյանն ինձ չի խաբել, մեկ այլ անձ է ինձ խաբել, իրենք ասում են չէ՝ Ծառուկյանն է խաբել այդ անձի հետ միասին»։

Ե. Սարգսյանի խոսքով, ապօրինությունները վկայում են, որ գործ չունեն իրավական պրոցեսների հետ, իրենք անում են այն,  ինչը որ հրապարակային հայտարարվել է,  որ պետք է արվի։

Պաշտպաններից Էմին Խաչատրյանն ասաց, որ դժվար էր պատկերացնել նման փուչ մեղադրանք. «Դատական նիստին մեղադրանքից քարը քարին չի թողնվել։ Եթե նույնիսկ այս հետապնդումները պետք է կազմակերպեին, պետք է ավելի լուրջ մեղադրանք մտածեին։ Այստեղ հանցագործության դեպք էլ չկար։

Այստեղ  բիզնես վեճ էլ չկա, ուղիղ իմաստով Գագիկ Ծառուկյանը պետք է ճանաչվեր տուժող, ուղղակի այս պարագայում տուժողին տրվել է մեղադրյալի կարգավիճակ»։

Հիշեցնենք, որ քննչական կոմիտեն Գագիկ Ծառուկյանին  երկու ամսով կալանավորելու միջնորդություն է ներկայացրել։ Դատարանն այժմ հեռացել է խորհրդակցական սենյակ՝ որոշում կայացնելու։ Գործով դատավորն է ընդհանուր իրավասության քրեական դատարանի դատավոր Գարիկ Աբելյանը։ Ծառուկյանը  ձերբակալվել է նախօրեին։ 

ՔԿ-ն երեկ տարածել էր հաղորդագրություն, ըստ որի, կոմիտեի տնտեսական հանցագործությունների և մաքսանենգությունների քննության գլխավոր վարչությունում քննվող քրեական վարույթներից մեկով փաստական տվյալներ են ձեռք բերվել այն մասին, որ Գ.Ծ.-ի կազմակերպմամբ մի շարք անձինք 2022-2024 թվականների ընթացքում առերևույթ կատարել են առանձնապես խոշոր չափերով խարդախություն և առանձնապես խոշոր չափերով փողերի լվացում: Ծառուկյանի փաստաբանը հայտարարել է, որ մեղադրանքներմ աբսուրդային ու ծիծաղելի են։