Ակցիզային հարկը կբարձրացվի. ԱԺ–ում իշխող ՔՊ-ն նախագիծը հաստատեց. ցնծացե՛ք և ուրախացե՛ք, նիկոլականներ

Հուլիսի 3-ին խորհրդարանը երկրորդ և վերջնական ընթերցմամբ հաստատել է 2027-2029 թվականների համար ակցիզային հարկի դրույքաչափերի փոփոխության ժամանակացույցը։

Հայաստանում ակցիզների դրույքաչափերը պարբերաբար ինդեքսավորվում են՝ հաշվի առնելով գնաճը, ինչպես նաև ԵԱՏՄ շրջանակում գործող պայմանավորվածություններին համապատասխան։ Դրա համար յուրաքանչյուր երեք տարին մեկ հաստատվում է նոր ժամանակացույց։ Գործող ժամանակացույցն ավարտվում է 2026 թվականի վերջին, իսկ ընդունվածը նախատեսված է 2027-2029 թվականների համար։

Կոնյակի ակցիզը սահմանվել է 4 հազար դրամի (10,8 դոլար) չափով՝ պայմանական 100 տոկոսանոց սպիրտի մեկ լիտրի համար (այսինքն՝ մոտավորապես 40 տոկոս թնդությամբ 2,5 լիտր կոնյակի համար)՝ անկախ հնեցման ժամկետից։ Այժմ դրույքաչափը կազմում է 3,3 հազար դրամից սկսած (8,9 դոլար)՝ մինչև երեք տարվա հնեցմամբ կոնյակի համար, մինչև 24 հազար դրամ (64,9 դոլար)՝ 20 և ավելի տարվա հնեցմամբ կոնյակի համար։ Այսպիսով, ակցիզը կբարձրանա մինչև հինգ տարվա հնեցմամբ կոնյակների համար, բայց կնվազի ավելի երկար հնեցվածների համար։

Մրգօղու ակցիզը նվազեցվել է 4,6 հազարից մինչև 3 հազար դրամ (8,1 դոլար) մեկ լիտրի համար՝ որպես ոլորտին աջակցելու միջոց։ Մնացած թունդ ալկոհոլային խմիչքների համար դրույքաչափը կպահպանվի 4,6 հազար դրամի (12,4 դոլար) մակարդակում՝ մեկ լիտրի համար։

Խաղողի և պտղահատապտղային գինու ակցիզը բարձրացվել է 165 դրամից մինչև 210 դրամ (0,57 դոլար) մեկ լիտրի համար։

Ծխախոտի ակցիզը կավելանա 19,5 հազարից մինչև 21 հազար դրամ (56,8 դոլար) հազար հատի համար, իսկ մինչև 2029 թվականը կհասնի 24 հազար դրամի (64,9 դոլար)։ Էլեկտրոնային ծխախոտների համար դրույքաչափը կաճի 4 150 դրամից մինչև 5 400 դրամ (14,6 դոլար) հազար հատի համար, իսկ մինչև 2029 թվականը՝ մինչև 9 հազար դրամ (24,3 դոլար)։

Նոր դրույքաչափերը ուժի մեջ կմտնեն 2027 թվականի փետրվարի 1-ից։