Ձեր մեղավորությունն է, որ Հայաստանի փոքրիկ Հիտլերը բռնաճնշումներ է իրականացնում և չի պատժվում. Արեգնազ Մանուկյան

Եվրոպացի պաշտոնյաների լուռ համաձայնությամբ ու ծափահարությունների ներքո Հայաստանը հետևողականորեն սահում է դեպի խիստ տոտալիտար ռեժիմ՝ վերածվելով բաց երկնքի տակ գտնվող բանտի։ Այս մասին հուլիսի 2-ին Կառավարության շենքի մոտ անցկացված բողոքի ակցիայի ժամանակ հայտարարել է «Մայր Հայաստան» կուսակցության անդամ Արեգնազ Մանուկյանը։

Նա երկրի ներքաղաքական ճգնաժամի համար ուղղակի պատասխանատվությունը դրել է Արևմուտքի և անձամբ Եվրահանձնաժողովի նախագահ Ուրսուլա ֆոն դեր Լայենի վրա՝ եվրոպական կառույցներին մեղադրելով երկակի չափանիշների քաղաքականության մեջ։

«Հենց ձեր մեղքով է Հայաստանը վերածվել բաց երկնքի տակ գտնվող բանտի։ Ձեր թողտվությամբ ապօրինի քրեական հետապնդումների են ենթարկվում Անդրանիկ Թևանյանը, Ավետիք Չալաբյանը և իշխանության բոլոր մյուս քաղաքական ընդդիմախոսները։ Ձեր լուռ համաձայնությամբ հարձակումներ են իրականացվում Հայ առաքելական եկեղեցու դեմ, վերաշարադրվում է Սահմանադրությունը, քաղաքացիների ձայները գողացվում են, իսկ Ղարաբաղը վերջնականապես հանձնվել է։

Դուք այս ամենի վրա աչք եք փակում, որովհետև ձեզ համար միևնույն է ղարաբաղցիների ճակատագիրը, միևնույն է Հայաստանի ժողովրդի ճակատագիրը, և ճիշտ նույն կերպ միևնույն է նաև ուկրաինացի ժողովրդի ճակատագիրը, որին դուք վերածել եք աշխարհաքաղաքական բախումներում սակարկության առարկայի», - ասել է Մանուկյանը։

Նրա խոսքով՝ Եվրամիության բարձրաստիճան պաշտոնյաների այցը Երևան՝ զանգվածային քաղաքական բռնաճնշումների ֆոնին, նման է ավտորիտարիզմի ուղիղ հավանության։ Նա ընդգծել է, որ հասարակությունն այլևս չի հավատում մարդու իրավունքների մասին եվրոպական կարգախոսներին։

«Մենք հաստատակամ «ՈՉ» ենք ասում այս բռնապետությանը և բռնաճնշումներին։ Մենք «ՈՉ» ենք ասում եվրոպական ժողովրդավարության կեղծ երկակի չափանիշներին։ Մեր գլխավոր պահանջն այսօր Անդրանիկ Թևանյանին և մյուս բոլոր քաղբանտարկյալներին անհապաղ ազատ արձակելն է։ Ազատություն քաղբանտարկյալներին», - եզրափակել է Արեգնազ Մանուկյանը։
Աղբյուր' News.am