Իսրայելի կողմից Հայոց ցեղասպանության ճանաչումն ունի քաղաքական ենթատեքստ, բայց նաև պատմական նշանակություն. Ռուբեն Մելքոնյան

Պետք է արձանագրել, որ Հայոց ցեղասպանության հարցը տարիներ, նույնիսկ տասնամյակներ շարունակ տարբեր պետությունների կողմից դիտարկվել է ոչ միայն հումանիտար և համամարդկային արժեքների, այլև սառը քաղաքական հաշվարկների համատեքստում։ Այս մասին «Փաստինֆո»-ի հետ զրույցում ասել է ԵՊՀ Արևելագիտության ֆակուլտետի դեկան, թուրքագետ Ռուբեն Մելքոնյանը՝ անդրադառնալով Իսրայելի կառավարության կողմից Հայոց ցեղասպանությունը պաշտոնապես ճանաչելուն։

«Իսրայելն այն պետություններից է, որը տասնամյակներ շարունակ խուսափել է Հայոց ցեղասպանության փաստի ճանաչումից, չնայած այն հանգամանքին, որ հրեա ժողովուրդը նույնպես բախվել է այդ համամարդկային չարիքին՝ Հոլոքոստին։ Ավելին, տարբեր տարիներին հրեական լոբբին փորձել է խանգարել և խոչընդոտել Հայոց ցեղասպանության ճանաչման գործընթացին տարբեր երկրներում, այդ թվում՝ ԱՄՆ-ում»,- նշել է Մելքոնյանը։

Նրա խոսքով՝ այս հանգամանքները պետք է դիտարկել ներկայիս թուրք-իսրայելական հարաբերությունների համատեքստում, որտեղ էլ, ըստ նրա, պետք է փնտրել Իսրայելի դիրքորոշման նման կտրուկ փոփոխության պատճառները։