«Սա ինքնախոսովանական ցուցմունք է, որ 5000 մարդnւ գլnւխ կերել է գիտակցաբար». Սաղաթելյանը՝ Փաշինյանի հայտարարության մասին

«Սա ինքնախոսովանական ցուցմունք է սույն անձի կողմից, որ Արցախը հանձնել է գիտակցաբար, 5000 մարդու գլուխ կերել է գիտակցաբար, 150000 մարդու անտուն, անհայրենիք, անգերեզման է դարձրել գիտակցաբար, որպեսզի իր իսկ բնութագրմամբ՝ հասնի այս լավ կետին»,– հայտարարեց  ՀՅԴ ԳՄ ներկայացուցիչ, ԱԺ «Հայաստան» խմբակցության պատգամավոր Իշխան Սաղաթելյանը՝  անդրադառնալով   Նիկոլ Փաշինյանի հայտարարությանը, որ՝ «ես այն մարդն եմ, ով ասել է՝ Արցախը Հայաստան է և վերջ, և այդ ասելու արդյունքում է, որ մենք հասել ենք այս կետին»։

Սաղաթելյանը շարունակեց. «Խնդրում եմ ուշադրություն, եթե մինչև հիմա Նիկոլ Փաշինյանն ասում էր, որ հայտարարել է՝ «Արցախը Հայաստան է և վերջ», որովհետև այդ ժամանակ այդպես է մտածել և այդպես է տեսել հարցերի լուծման ճանապարհը, հիմա շատ ուղիղ ասում է, որ հանձնել է Արցախը, 5000 մարդու գլուխ կերել է, Ադրբեջանի զորքերը բերել նստեցրել է Հայաստանի տարածքում այս կետին հասնելու համար»։

Նրա խոսքով,  «այս տեսանյութը նաև նրանց համար է, ովքեր դեռ կարծում են, որ, դե, խեղճ Նիկոլն ի՞նչ աներ, ամեն ինչ որոշված էր և այդպես էլ պետք է լիներ»։

«Բնականաբար ոչ՝ պատերազմը, պատերազմի արդյունքը, պատերազմի հետևանքները Նիկոլ Փաշինյանի կողմից գիտակցված և հետևողական քայլի արդյունքն էր՝ բոլոր հետևանքներով, իսկ այն կետը, որին հասցրեց իշխանությունը, ինչ վիճակում ենք և դրան ինչ է հետևելու, դրա մասին շատ ենք ասել և դեռ խոսելու ենք»,– ասաց Սաղաթելյանը։