Փաշինյանը որոշել է փոքրիկ Հիտլեր խաղալ և նացիստական ռեժիմ սահմանել Հայաստանում. Մանուկյան

Մենք հայտնվել ենք մի իրավիճակում, երբ Նիկոլ Փաշինյանը լեգիտիմության ակնհայտ խնդիրներ ունի, փորձում է իր իշխանությունն ամրապնդել ռեպրեսիաների միջոցով։ Այս մասին, այսօր՝ հունիսի 26–ին, ՍԴ–ի դիմաց ընդդիմադիր ուժերի համատեղ բողոքի ակցիայի ժամանակ նշեց «Մայր Հայաստան» կուսակցության անդամ Արեգնազ Մանուկյանը, որի տանը օրեր առաջ խուզարկություն էր իրականացվել։

«Երեկ մենք ՄԻՊ–ի գրասենյակի մոտ էինք ակցիա անում, նաև հանդիպեցինք Պաշտպանի հետ, ներկայացրեցինք մեր մտահոգությունները։ Ես ասացի, որ օր չկա, որ որևէ մեկի տուն չմտնեն, խուզարկություն չիրականացնեն, չկալանավորեն կամ չձերբակալեն։ Այսինքն այդպիսի բացառիկ օրեր մենք առաջիկայում չենք ունենա և գնալով այս ռեպրեսիաները շատանում են, որովհետև Նիկոլ Փաշինյանը որոշել է փոքրիկ Հիտլեր խաղալ և նացիստական ռեժիմ է ուզում հաստատել Հայաստանում։  

Նաև պետք է հիշել, որ նացիստական այս ռեպրեսիաներն էլ մի անգամից չեն հաստատվել, այդ ռեժիմը տեղի է ունեցել այսպիսի փոքր ձերբակալություններով, հետապնդումներով, ու քանի որ համատարած լռություն է տեղի ունեցել, այդ չարագործը կարողացել է ամրապնդել իր դիրքերը։ Իսկ  թե վերջում ինչ տեղի ունեցավ, արդեն պատմությունից բոլորիս է հայտնի։

Հիմա այս միջազգային հանրության լռության ներքո դեսպանատների, մարդու իրավունքների պաշտպանությամբ զբաղվող հասարակական կազմակերպությունների, այս համատարած լռության ներքո, կամ կողքից Նիկոլ Փաշինյանին սատարելու իրենց ջանքերի շնորհիվ, մենք փաստորեն նոր փոքրիկ ֆյուրեր ենք ստանում, որովհետև իրենց համար ավելի կարևոր են ոչ թե ժողովրդավարական արժեքները, այլ այն, որ Նիկոլ Փաշինյանը դարձել է իրենց ձեռքին գործիք ընդդեմ Ռուսաստանի և Հայաստանը դարձրել է աշխարհաքաղաքական մանրադրամ»,– հայտարարեց Մանուկյանը։

Նշենք, որ Սահմանադրական դատարանի դիմաց բողոքի ակցիա է ընթանում, որտեղ հավաքվել են ընդդիմադիր քաղաքական ուժերի ներկայացուցիչները և նրանց աջակիցները։ Մասնավորապես, համատեղ ակցիա են անում «Ուժեղ Հայաստան» դաշինքը, «Հայաստան» դաշինքը։ Այստեղ են նաև ԲՀԿ–ականները, «Հայաքվե» նախաձեռնության անդամները։

Նշենք, որ այսօր ՍԴ–ում մեկնարկել է ԱԺ ընտրությունները վիճարկող 7 քաղաքական ուժերի դիմումների քննությունը։
Աղբյուր՝ News.am