Ավելի քան կես միլիոն քաղաքացիներ իրենց քվեով հստակ արտահայտել են, որ չեն կիսում Փաշինյանի հակահայ օրակարգը. Հայ դատ

Հայաստանի Հանրապետության վարչապետ Նիկոլ Փաշինյանը «մոլորության» մեջ է։ Բոլշևիկյան գաղափարախոսության մեկ վիժված տարբերակը որդեգրած, Սովետական Միության ներքին վարչական սահմանները հետխորհրդային միության միջպետական սահմաններ ճանանաչած Նիկոլ Փաշինյանը չի հասկացել նաև ժողովրդավարության իմաստը, էությունը։ Ըստ պաշտոնական թվերի՝ Հայաստանի Հանրապետության քաղաքացիների հիսուն տոկոսից էլ պակաս քվե ստացած «Քաղաքացիական պայմանագիր» կուսակցության ղեկավարին թվում է,  թե այդքանով նա հաստատել է իր «դիկտատուրան»։ Նա չի հասկանում, որ ժողովրդավարությունը մեծամասնության իշխանությունն է՝ միաժամանակ երաշխավորելով փոքրամասնության մարդկային և քաղաքացիական իրավունքները։ Այս մասին հայտարարություն է տարածել ՀՅԴ Հայ դատի կենտրոնական խորհուրդը:

Նիկոլ Փաշինյանը հայտարարել է. «Ցանկացած քայլ, որը հակասում է Հայաստանի Հանրապետության ժողովրդի կատարած ընտրությանը, իսկ ժողովուրդը ասել է, որ Ղարաբաղի շարժումը չի շարունակվում, չի շարունակվելու, հիմա ցանկացած փորձ այլ մակարդակներում Ղարաբաղի շարժումը շարունակելու բերելու է հայելային արձագանքներ, ընդ որում, էդ պրոցեսը կարա խնդիրներ, այո, առաջացնի»: Նիկոլ Փաշինյանն անտեսում է, որ Հայաստանի Հանրապետության առնվազն ավելի քան կես միլիոն քաղաքացիներ, իրենց քվեի իրավունքով, չեն կիսում իր՝  «Ղարաբաղի շարժումը չի շարունակվում, չի շարունակվելու» տեսակետը։ Այդ ավելի քան կես միլիոն ՀՀ քաղաքացիները իրավունք ունե՛ն իրենց տեսակետը բարձրաձայնելու, հետապնդելո՛ւ, եթե նույնիսկ «էդ պրոցեսը կարա խնդիրներ, այո, առաջացնի»։

Ավելին, Նիկոլ Փաշինյանը, որի կուսակցությունը հետևողականորեն հրաժարվել է եւ շարունակում է հրաժարվել այն ամեն ինչից,  ինչ համահայկակա՛ն է, ազգայի՛ն է, ցանկանում է ստիպել, որ Հայաստանի Հանրապետության սահմաններից դուրս ապրող հայերն՝ անկախ իրենց քաղաքացիությունից, զրկվեն իրենց տեսակետն ունենալու, այդ տեսակետն արտահայտելու և դրա իրականացումը հետապնդելու իրավունքից: Նա ասում է. «Ես շատ ուղիղ ասում եմ՝ Միացյալ Նահանգների դաշնակցական լոբբինգը ինչքան էդ ուղղությամբ ջանքեր գործադրեց, ինչքան քայլեր արեց, ստանալու են…»։ Ա՛յս է Նիկոլ Փաշինյանի ժողովրդավարության ըմբռնումը ՝ «դիկտատուրա», եթե ոչ «պրոտելատարիատի», ապա՝ ՔՊ կուսակցության։

Նիկոլ Փաշինյանը, միաժամանակ եւ հետևողականորեն, շարունակում է Ադրբեջանի հակահայ եւ հակաՀայաստան քայլերն արդարացնողի իր վարքագիծը՝ Հայաստանի Հանրապետության տարածքային ամբողջականության դեմ ուղղված «Արևմտյան Ադրբեջանի» քարոզչությունն ու այդ ուղղությամբ Ադրբեջանի պետական քայլերը համարելով պարզապես «հայելային արձագանքներ»։

Պատմությունից և ներկա իրականությունից ոչինչ չհասկցած կամ չհասկցող Նիկոլ Փաշինյանի համար հայ ազգային քաղաքական միտքն է պատճառը, որ Թուրքիան գործադրել է Հայոց ցեղասպանությունը, որ Ադրբեջանը ցեղասպանական քաղաքականություն է վարել Արցախի դեմ՝ հայաթափ ընելով այն, որ Ադրբեջանն ու Թուրքիան այսօր, միասնաբար, սպասռնում են Հայաստանի Հանրապետության գոյությանը, սպառնում են առնվազն պատերազմով, եթե չբավարարվեն իրենց պահանջները։

Նիկոլ Փաշինյանը հայտարարել է, որ «Ղարաբաղյան շարժումը շարունակելու բոլոր փորձերը […] մենք գնահատելու ենք Հայաստանի ժողովրդին նոր ավանտյուրայի մեջ ներքաշելու փորձ եւ մեր լիազորությունների եւ օրենքի սահմաններում ամեն ինչ անելու ենք դա կասեցնելու համար»։ Նիկոլ Փաշինյանը հույս ունի այդպիսով թաքցնել, որ իր իշխանության ութնամյա քաղաքականությունն ու քայլերն են, որ «Հայաստանի ժողովրդին նոր ավանտյուրայի մեջ են ներքաշել»՝ սպառանալիքի տակ դնելով նա՛և Հայաստանի Հանրապետությունը։

Հ.Յ.Դ. Հայ Դատի համակարգը նորոգված վճռակամությամբ և նպատակասլաց շարունակելու է իր աշխույժ մասնակցությունը բերել Հայ Յեղափոխական Դաշնակցության պայքարին՝ պաշտպանելու հայության, ներառյալ՝ արցախցիների բոլո՛ր իրավունքները, ամենուրե՛ք։

ՀՅԴ ՀԱՅ ԴԱՏԻ ԿԵԴՐՈՆԱԿԱՆ ԽՈՐՀՈՒՐԴ
26 հունիս 2026