Ընտրություններին վարչական ռեսուրսի կիրառումը վտանգավոր է նրանով, որ անտեսանելի կերպով փոխում է ամբողջ ընտրական միջավայրը. Դրմեյան

«Դատարանը պետք է պատասխանի ոչ թե այն հարցին՝ արդյոք ապացուցել է  յուրաքանչյուր ձայնի ճակատագիրը, այլ այն հարցին, թե արդյոք պահպանվել է հանրային վստահությունն ընտրությունների նկատմամբ»,- ՍԴ-ում  հունիսի 7-ին կայացած ԱԺ հերթական ընտրությունների արդյունքները վիճարկող 7 քաղաքական ուժերի դիմումների հիման վրա միացված գործի քննությանն ասաց փաստաբան, «Միասնության թևեր» կուսակցության ներկայացուցիչ Լիպարիտ Դրմեյանը։ 

Ըստ նրա, եթե այդ վստահությունը խաթարվել է համակարգային խախտումների հետևանքով, ապա ընտրությունները չեն կարող պահպանվել միայն այն պատճառով, որ հնարավոր չէ ճշգրիտ հաշվարկել դրանց թվային ազդեցությունը։ 

«Եթե այս գործի ողջ նյութերից անհրաժեշտ լինի առանձնացնել մեկ հարց, որից շուրջ պետք է կենտրոնանա ՍԴ ուշադրությունը, ապա այդ  հարցը վարչական ռեսուրսի օգտագործման խնդիրն է, ոչ այն պատճառով, որ վարչական  ռեսուրսի օգտագործումն ինքնին ամենածանր խախտումն է, այլ այն պատճառով, որ վարչական ռեսուրսի կիրառումը վտանգավոր է  նրանով, որ անտեսանելի կերպով փոխում է  ամբողջ ընտրական միջավայրը»,- ասաց Լ.Դրմեյանը։  

Նա, օրինակի համար նշեց, որ ընտրակաշառքը հնարավոր է տեսնել, կեղծված արձանագրությունը հնարավոր է բացահայտել, քվեատուփի լցոնումը հնարավոր է  արձանագրել, բայց վարչական ռեսուրսի  օգտագործումը գործում է  այլ մակարդակում. «Այն փոխում է  քաղաքական մրցակցության կանոնները, ձևավորում է անհավասար մեկնարկային պայմաններ, թույլ է  տալիս իշխանություն ունեցող քաղաքական ուժին օգտագործել պետության կազմակերպչական, տեղեկատվական, մարդկային ռեսուրսներն այնպիսի ծավալով, որն անհասանելի է մրցակիցներին։ 

Հենց այդ պատճառով միջազգային իրավունքում վարչական ռեսուրսի չարաշահումը համարվում է ազատ ընտրությունների ամենավտանգավոր սպառնալիքներից մեկը»։ 

Հիշեցնենք՝ «Միասնության թևեր» կուսակցությունը ՍԴ-ից պահանջում է հունիսի 7-ին կայացած ընտրությունների արդյունքներն անվավեր ճանաչել և վերաքվեարկություն նշանակել։
Աղբյուր՝ Panorama.am