Երկու հզոր երկրաշարժներ ցնցել են Վենսուելան. Ի՞նչ իրավիճակ է երկրում

Վենեսուելայի ժամանակավոր առաջնորդ Դելսի Ռոդրիգեսը երկրում արտակարգ դրություն է հայտարարել երկու հզոր երկրաշարժերից հետո, որոնք, նախնական տվյալներով, բազմաթիվ մարդկանց մահվան պատճառ են դարձել, փլուզել են տասնյակ շենքեր՝ հաղորդում է The Guardian-ը։

Իշխանությունները զգուշացնում են, որ զոհերի թիվը կարող է զգալիորեն աճել, քանի որ հարյուրավոր մարդիկ վիրավորվել են, իսկ որոշ բնակիչներ դեռևս մնացել են փլատակներում։

ԱՄՆ երկրաբանական ծառայության (USGS) տվյալներով՝ գրանցվել են 7.2 և 7.5 մագնիտուդ ուժգնությամբ երկրաշարժեր, որոնց էպիկենտրոնը գտնվել է Վենեսուելայի Կարիբյան ափին՝ Մորոն համայնքից արևմուտք, Կարակասից մոտ 168 կմ հեռավորության վրա։ Երկրաշարժերի օջախը եղել է մոտ 13 կմ խորության վրա։

Ամենամեծ ավերածությունները գրանցվել են մայրաքաղաք Կարակասում և նրա շրջակայքում։ Սոցիալական ցանցերում տարածված տեսանյութերում երևում են խուճապի տեսարաններ, երբ մարդիկ փորձում են փրկվել վնասվող շենքերից և թափվող բեկորներից։ Լուրջ վնասների պատճառով փակվել է Մայկետիայի օդանավակայանը, դադարեցվել են նաև մետրոյի և երկաթուղային համակարգերի աշխատանքները։

Ռոդրիգեսը հեռուստատեսային ուղերձում կոչ է արել քաղաքացիներին տարհանվել վնասված շենքերից և պահպանել հանգստություն։ Նա ցավակցություն է հայտնել զոհվածների ընտանիքներին՝ ընդգծելով, որ իրավիճակը շարունակում է մնալ ծանր։

Reuters-ի հաղորդմամբ՝ Կարակասի Բարուտա և Չակաո շրջաններում մի քանի շենքերի փլուզման հետևանքով զոհեր և տասնյակ վիրավորներ կան։ Փրկարարական աշխատանքները շարունակվում են, իսկ իշխանությունները զգուշացնում են հնարավոր հետցնցումների մասին, որոնք կարող են նոր փլուզումներ առաջացնել արդեն վնասված կառույցներում։

Լրջորեն տուժել է նաև Լա Գուայրա նավահանգստային քաղաքը, որտեղ վնասվել են բնակելի շենքեր, հյուրանոցներ և ռազմածովային ակադեմիայի շինությունները։

ԱՄՆ նախագահ Դոնալդ Թրամփը հայտարարել է, որ Միացյալ Նահանգները պատրաստ է օգնություն ցուցաբերել Վենեսուելային։ Միաժամանակ Կարակասում ԱՄՆ դեսպանատունը իր քաղաքացիներին կոչ է արել խուսափել վնասված տարածքներից և ապաստան գտնել անվտանգ վայրերում։

Փրկարարները, կամավորներն ու տեղացիները շարունակում են որոնողական աշխատանքները՝ հույս ունենալով փրկել հնարավորինս շատ մարդկանց։