ԱՄՆ-ն ու Իրանը համաձայնության են եկել վերջնական համաձայնագրի շուրջ

ԱՄՆ փոխնախագահ Ջեյ Դի Վենսի և Իրանի խորհրդարանի խոսնակ Մոհամմադ Բաղեր Ղալիբաֆի գլխավորած պատվիրակությունների միջև բանակցությունների առաջին փուլն ավարտվել է, Reuters-ի փոխանցմամբ՝ հայտնել են միջնորդները:

ԱՄՆ-ի և Իրանի բարձրաստիճան պաշտոնյաների միջև Շվեյցարիայում անցկացված բանակցությունների առաջին փուլն ավարտվել է՝ միջնորդ երկրների հայտարարությամբ. կողմերը համաձայնել են առաջ շարժվել հետագա բանակցությունների ճանապարհային քարտեզով։ Ըստ միջնորդների՝ տեխնիկական մակարդակի հանդիպումները կշարունակվեն այս շաբաթ, որի նպատակն է մոտ 60 օրվա ընթացքում հասնել ավելի համապարփակ համաձայնության:

Կողմերը համաձայնության են եկել Լիբանանում մարտական գործողությունները դադարեցնելու մեխանիզմի շուրջ, ինչպես նաև հաղորդակցության ուղի են հաստատել՝ վիճելի Հորմուզի նեղուցով առևտրային նավերի անվտանգ անցումն ապահովելու նպատակով։

Իրանի ԱԳ նախարար Աբբաս Արաղչին սոցցանցի իր էջում հայտարարել է, որ բանակցությունների արդյունքում իրանական նավթաքիմիական ապրանքատեսակների արտահանման դեմ որոշ պատժամիջոցներ դադարեցվում են, սառեցված ակտիվների մի մասը՝ ազատվում, մեկնարկում է նաև Իրանի վերակառուցման և զարգացման ծրագիրը։ Աբբաս Արաղչին ողջունել է միջնորդներ Պակիստանի և Կատարի օգնությամբ ձեռք բերված «մեծ առաջընթացը»:

Սպիտակ տնից չեն մեկնաբանել՝ բանակցություններն այս պահի համար ավարտվա՞ծ են:

Բանակցությունների մեկնարկից անմիջապես առաջ Fox News-ը հաղորդեց, որ նախագահ Թրամփը իրանցի պաշտոնյաներին զգուշացրել է՝ եթե կրկին Հորմուզը փակեն, նրանք «երկիր չեն ունենա»։ Նա վերահաստատել է ավելի վաղ արած պնդումը, թե Վաշինգտոնն ինքը կարող է վերահսկողություն սահմանել նեղուցի նկատմամբ և հնարավոր է տուրքեր գանձի: