Եվրախորհրդարանը պահանջներ ունի Վրաստանից, իսկ Հայաստանից՝ ո՞չ

Երկու օր առաջ ներկայացվեց Եվրախորհրդարանի հաշվետվությունը Վրաստանի մասով, որտեղ պահանջվում է հետևյալ խնդիրներին լուծումներ տալ։

Հերթով ներկայացնենք, թե ինչ էր պահանջում այդ կառույցը ներկայիս Վրաստանի իշխանություններից։

Առաջին

Եվրոպական խորհրդարանը պահանջում է քաղաքական դրդապատճառներով ձերբակալված բոլոր անձանց անհապաղ և անվերապահ ազատ արձակել։

Երկրորդ

Կոռուպցիայի վերաբերյալ հավաստի հանրային ապացույցներին հակառակ, նախկին վարչապետ Իրակլի Ղարիբաշվիլիի կալանավորումը լուրջ մտահոգություններ է առաջացնում այն ​​​​մասին, թե արդյոք դատական ​​​​գործընթացները համապատասխանում էին արդար դատաքննության չափանիշներին, ասվում է Վրաստանի վերաբերյալ Եվրոպական խորհրդարանի զեկույցում։

Երրորդ

Եվրոպական խորհրդարանը վերահաստատում է նախկին նախագահ Միխեիլ Սաակաշվիլու անհապաղ ազատ արձակման իր պահանջը՝ մարդասիրական նկատառումներից ելնելով։

Չորրորդ

Եվրոպական խորհրդարանը դատապարտում է իշխող «Վրացական երազանք» կուսակցության կողմից քաղաքական հակառակորդներին հետապնդելու փորձերը, այդ թվում՝ անօրինական ձերբակալությունների, սպառնալիքների և ֆիզիկական հարձակումների միջոցով։

Ուշադրություն դարձնելով Եվրախորհրդի հաշվետվությանը Վրաստանի մասով, կարելի է նկատել, որ այս նույն կառույցը մինչ այսօր, որև է նմանատիպ պահանջներով հանդես չի եկել Հայաստանի վերաբերյալ։

Հիշեցնենք, որ Հայաստանում, շինծու մեղադրանքներով կալանավորվել էին Սամվել Կարապետյանը, Բագրատ սրբազանը, Միքայել արքեպիսկոպոս Աջապահյանը և բազմաթիվ այլ հոգևորականներ։

Մինչ այդ հետապնդման էին ենթարկվել նախկին նախագահ Ռոբերտ Քոչարյանը, ՀՀԿ փոխնախագահ Արմեն Աշոտյանը և այլ նախկին պաշտոնյաներ, ընդդիմադիրներ։

Ի՞նչ է ստացվում Եվրախորհրդարանի համար, Սաակաշվիլուն կարելի է աջակցել, իսկ Քոչարյանին՝ ո՞չ։

Կամ նախկին վարչապետ Ղարիբաշվիլիի մեղադրանքը կարելի է կասկածի տակ դնել, իսկ Աշոտյանինը ո՞չ։

Եվ վերջապես, այս ընտրություններից ընդամենը երկու շաբաթ առաջ, Փաշինյանը հանրահավաքի ժամանակ ցուցում է տալիս, որ կալանավորեն «Մայր Հայաստանի» առաջնորդ Անդրանիկ Թևանյանին, ով  նաև ԲՀԿ–ի 2–րդ համարի պատգամավորի թեկնածու էր։

Ընդ որում, Թևանյանը նախկինում ոչ պաշտոն էր ունեցել, որ կորուպցիայի մասով մեղադրանք առաջադրեին, ոչ էլ բիզնես, որ հարկեր թաքցնելու հոդված «կարեին»։

Չունենալով այլ հիմնավորում, նրան օդից մեղադրանք «կարեցին», «պետական դավաճանության» հոդվածով, փաստացի թույլ չտալով որ ԲՀԿ–ն ակտիվ աշխատեր իր ընտրողների հետ, իսկ վերջում էլ միտումնավոր և կանխամտածված գործ «կարեցին»,  ԲՀԿ–ին անօրինական ձևով դուրս թողնելով ապագա ԱԺ–ից՝ փաստացի խեղաթյուրելով ընտրության արդյունքները։

Երկրի գործող ղեկավարն արդեն հրապարակային է մեղադրանքներ իջեցնում մյուս ընդդիմադիր գործիչների հասցեին, իսկ պատկան մարմիններն էլ լուռ կատարում են բռնապետի բոլոր հրահանգները։

Սակայն այս ամենը Եվրախորհրդարանը չի նկատում, կամ չի ուզում նկատել։

Սակայն մանրադիտակի տակ է պահում հարևան Վրաստանի իշխանությունների բոլոր քայլերը։

Մի՞թե այս ամենից հետո կլինի մարդ, ով լուրջ կսկսի վերաբերվել Եվրախորհրդարանի, որպես ինստիտուտի նկատմամբ։

Կարելի է ասել, որ ներկայիս եվրոպական լիդերները իրենց ձեռքերով ամբողջովին կազմաքանդեցին Եվրոպայի և եվրոպական արժեքների վարկանիշը Հայաստանում և Վրաստանում։

Եվ այս կոնկրետ հարցում, հաստատ Մոսկվան որևէ դերակատարում չի ունեցել։

Սա է իրականությունը։

Դավիթ Մկրտչյան
Zham.am