Միքայել Սրբազանի նկատմամբ բացահայտ քաղաքական հետապնդում է տեղի ունեցել. Մարինե Ֆարմանյան

«Միքայել Սրբազանի նկատմամբ բացահայտ քաղաքական հետապնդում է տեղի ունեցել»,- Վերաքննիչ քրեական դատարանում (դատավորներ՝ Է.Մանասյան, Ն.Հովակիմյան և Վ.Մարգարյան) հայտարարեց Շիրակի թեմի առաջնորդ Միքայել արքեպիսկոպոս Աջապահյանի պաշտպան Մարինե Ֆարմանյանը։

Նա նշեց, որ Սրբազանը մշտապես ուշադիր է  եղել Հայաստանին, հայերին վերաբերող խնդիրներին, որպես հոգևոր առաջնորդ հետևել է պետության  կողմից վարվող քաղաքականությանը, անհրաժեշտության դեպքում քննադատել է  ինչպես նախկին, այնպես էլ ներկա իշխանություններին։ 

«Ներկայիս իշխանության, մասնավորապես  վարչապետ Նիկոլ Փաշինյանի գլխավորությամբ, «Քաղաքացիական պայմանագիր»  իշխանական կուսակցության դեմ Սրբազանի քննադատությունները առավել հաճախակի և սուր են դարձել 44-օրյա պատերազմի և առավելապես Արցախի կորստի պառճառով, ինչից հետո Միքայել Սրբազանը ենթարկվում է  բացահայտ քաղաքական հետապնդման իշխանությունների կողմից»,- ասաց Ֆարմանյանը։ 

Նա նաև հայտարարեց, որ Միքայել Սրբազանի նկատմամբ քրեական հետապնդումը Նիկոլ Փաշինյանի հակաեկեղեցական շարժման հետևանքն է, որը սանձազերծել է 2025 թ. մայիսի 30-ից։

«Այս ողջ գործընթացը Սրբազանի նկատմամբ իրականում պատժի տարրեր են պարունակում, դրանք գտնվել են անմիջապես Նիկոլ Փաշինյանի վերահսկողության ներքո»,- ասաց փաստաբան Մ. Ֆարմանյանը։ 
Աղբյուրը` Panorama.am