Այս խորհրդարանը կարճ կյանք ունի, դրա համար 2 հիմք կա. Քաղաքագետ

«2017 թվականի ԱԺ ընտրությունների հաջորդ օրը գրել էի, որ դա մեկ տարվա խորհրդարան է։ Այս խորհրդարանն էլ է մեկ տարվա։ Այսօրվանից պետք է պատրաստվել հսջորդ արտահերթ ընտրություններին»,-ֆեյսբուքյան իր էջում գրել է քաղաքագետ Ստեփան Դանիելյանը։

Արտահերթ ընտրությունների վերաբերյալ իր համոզման հիմքերի շուրջ Panorama.am-ը զրուցել է քաղաքագետի հետ։  Նշենք, որ նա նաև «Մայր Հայաստան» կուսակցության ներկայացուցիչ է, խորհրդարանական ընտրություններին ընդգրկված էր ԲՀԿ ընտրական ցուցակում։

Ստեփան Դանիելյան- Մեկ տարին պայմանական է, կարող է՝ 8 ամիս է, մեկ ու կես տարի, այստեղ խնդիրը գաղափարն է։ Ի՞նչն է հիմք տալիս նման կարծիք հայտնելու:

Առաջինը կա հանրային անվստահություն այս ընտրությունների նկատմամբ, դա համատարած է, քանի որ գործող այս խումբը, երբ իշխանության է եկել, ու իրենց պարագլուխը, միշտ ասում էին, որ իրենց ընտրել է ժողովուրդը, և ինքը ժողովրդի տեսակետն է արտահայտում, ինչը  իրականությանը որոշակի համապատասխանում էր, քանի որ ոչ մի կասկած չկար, որ անկախ որոշակի կեղծիքներից՝ 2018-ին և 2021-ին նա ընտրվել է։  Բայց հիմա ինքը հանրությունն այլևս չի ներկայացնում, և անօրինականությունների վերջին գագաթնակետը ԿԸՀ երեկվա որոշումն էր, երբ երեք տեղամասերի ընտրությունների արդյունքներն անվավեր են ճանաչվել, վերաքվեարկության որոշում չի ընդունվում ու խորհրդարանի կառուցվածքը փոխվում է։

Երկրորդը, միջազգային աշխարհքաղաքական փոփոխություններն են։ Իրանն ու ԱՄՆ-ն արդեն գնում են գործարքի, Իրանի դերը տարածաշրջանում շատ կտրուկ կերպով մեծանում է, և եթե Ռուսաստան-Ուկրաինա հակամարտության մեջ կես տարվա ընթացքում ինչ-որ սառեցում լինի… այսինքն, աշխարհքաղաքական փոփոխություններ են տեղի ունենալու, իսկ գործող իշխանության ողջ ռեսուրսն արտաքին աշխարհից է, արտաքին հովանավորներ ունի։ Այդ փոփոխություններն ազդեցություն կունենան։

Panorama.am-Պարոն Դանիելյան, ինչո՞ւ ԿԸՀ-ն կայացրեց վերաքվեարկություն չանցկացնելու որոշում՝ այդպիսով սև բիծ քաշելով ընտրությունների, դրա արդյունքների, նաև ձևավորվելիք խորհրդարանի վրա։

Ստեփան Դանիելյան-Այդ որոշումը ԿԸՀ-ն չի ընդունել, դա ընդունել է մի անձնավորություն, որի ազգանունը Փաշինյան է։ Այդ որոշման ընդունման պատճառը շատ պարզ է, որպեսզի ՔՊ-ն խորհրդարանում ունենա մանդատների 3/5-ը։ Դա հակասահմանադրական, անօրինական որոշում է, այսինքն, գործող իշխանությունը հակասահմանադրական է։