Լռեցնելու և հասարակությանն ահաբեկելու դասական բռնատիրական դրսևորում
Քաղաքագետ, ԵՊՀ դասախոս Ալեն Ղևոնդյանի դեմ փաշինյանական հեռացող իշխանության ռեպրեսիվ մարմինների այսօրվա կիրառած քաղաքական հալածանքը, որին նրանք փորձում են քրեական փաթեթավորում տալ, բռնատիրական ռեժիմներին բնորոշ դրսևորում է:
Մարդու դեմ քրեական գործ են հարուցել, սահմանափակել են խոսքի ու հավաքների մասնակցելու ազատությունը... բացառապես ֆեյսբուքյան գրառման համար, որի բովանդակությունը ինչ-որ մեկը գնահատել է «սահմանադրական կարգը տապալելուն» նպատակամղված խոսք:
Այդ հրապարակման լուսանկարը դուք տեսնում եք: Այստեղ ոչ մի նման արտահայտություն չկա, ինչն ակնհայտ է: «Կոշտ գործիքակազմը» (քաղաքական ու քաղաքագիտական առումներով) ոչ մի կերպ չի կարող մեկնաբանվել որպես «սահմանադրական կարգի» դեմ ուղղված: Դա ակնհայտ է տարրական դատողունակություն ունեցող յուրաքանչյուրին:
Քաղաքագետը, հավանաբար ու բնականաբար, նկատի է ունեցել իշխանությունների վրա ճնշում գործադրելու այնպիսի սահմանադրական և օրինական եղանակներ, ինչպիսիք են համընդհանուր գործադուլը, պիկետները, քաղաքացիական համատարած անհնազանդությունը և այլն:
Հաստատ նկատի չի ունեցել ռազմականացված պահպանության տակ գտնվող պետական ռազմավարական նշանակության հաստատություն («Հանրային ռադիո») բռնի ներխուժելու, պետական գույքը միտումնավոր վնասելու՝ դռներ ջարդելու, ուղիղ եթեր պահանջելու գործողություններ, ինչպիսիք իրենց թույլ են տվել ոմանք, ավելի քան 8 տարի առաջ: Գիտեք, թե՝ ով (ովքեր):
Իսկ այն, ինչ կատարվել է Ալեն Ղևոնդյանի դեմ փաշինյանական իշխանության ռեպրեսիվ մարմինների կողմից, դա հանրորեն ակտիվ մարդուն լռեցնելու, ավելին՝ հանրությանն ահաբեկելու դասական բռնատիրական դրսևորում է: Սա ձեզ կարող է բացատրել դեռևս չձերբակալված ու սահմանափակումների տակ չդրված ցանկացած նորմալ քաղաքագետ:
Ի դեպ, քաղաքագետ Վլադիմիր Մարտիրոսյանը ֆեյսբուքյան էջում գրել է. «Ալեն Ղևոնդյանի պես տղերքի նկատմամբ բռնաճնշումը ռեժիմի կողմից լայն առումով փորձ է լուծել ձիգ հասարակության ապաքաղաքականացման, մարգինալացման, նոմինալացման, հիասթափեցման և քաղաքական վնասազերծման հարցը։ Քաղաքագիտության հետ պրոբլեմ ունենալը լավ բանի չի բերելու, իմացեք: Ալեն ջան, պի՛նդ»:
...Մեր կողմից նկատենք. գիտե՞ք, այսպես որ գնա, կմնա, թերևս սպասել այն օրվանը, երբ պաշտոնական Բրյուսելն ու Հայաստանում Եվրամիության ներկայացուցիչը ջերմորեն կողջունեն մեր երկրում այլախոհների առաջին զանգվածային գնդակահարությունները, իսկ Ֆոն դեր Լայենն ու Մակրոնը կժամանեն Երևան, որպեսզի անձամբ մասնակցեն առաջին համակենտրոնացման ճամբարի պաշտոնական բացման արարողությանը:
Հետևեք մեզ Facebook-ում