Իշխանությունը բացում է իր «խաղաթղղթերը». ապրիլից հետո վարչապետը կլինի Սերժ Սարգսյանը, իսկ փոխվարչապետը` Կարեն Կարապետյանը
Թեև իշխանության ներկայացուցիչները խուսափում են կոնկրետ նշել, թե ով է լինելու հետապրիլայն վարչապետը, այսօր կառավարության կողմից ԱԺ ներկայացված Կառավարության կառուցվածքի մասին օրենքի նախագիծը ամեն բան արդեն բացահայտում է: Վարչապետն ունենալու է մեծ լիազորություններ: Նրան են ենթարկվելու երկու ուժային կառույցները, ներքին գործերն ու ազգային անվտանգությունը:
Փաստացի ներկայիս նախագահական լիազորությունները «կարվելու է» ապագա վարչապետի վրա: Օրենքի նախագծի այս մասը հուշում է, որ այն գրված է կոնկրետ Սերժ Սարգսյանի համար: Բացի այդ, նախատեսվում է 1-ին փոխվարչապետի պաշտոն ունենալ ապագա կառավարության կառուցվածքում, ով պիտի զբաղվի տնտեսական խնդիրներով և պիտի պատասխանատվություն կրի դրա համար: Պարզ է, որ այդ պաշտոնն էլ նախատեսված է ներկայիս վարչապետ Կարեն Կարապետյանի համար: Նրա փաստացի լիազորությունները չեն փոխվելու, ինչը ամենայն հավանականությամբ համաձայնեցված է նրա հետ: Կարավարության ապագա կառուցվածքից երևում է, որ Վաչե Գաբրիելյանի ներկայիս պաշտոնը վերանալու է: Իսկ ինչպիսին կլինի Գաբրիելյանի ճակատագիրը, հայտնի չէ: Մյուս փոփոխություննները թերևս երկրորդական բնույթ ունեն, իսկ հետաքրքրությունը չնչին, քաղաքական տեսանկյունից:
Այսպիսով կարող ենք արձանագրել, որ թեև ՀՀԿ-ն իր դիրքորոշումը ապագա վարչապետի ու նրա տեղակալների մասին դեռ պաշտոնապես չի հայտնել, այնուամենայնիվ այսօր արդեն իր ապագա կառավարության կառուցվածքը ներկայացնելով դե –ֆակտո բացահայտել է իր «խաղաթղթերը»՝ իր ապագա առանցքային կադրերի վերաբերյալ:
Հակոբ Կարապետյան
Հետևեք մեզ Facebook-ում