Փաշինյանի գիշերվա ասուլիսի պնդումները ժողովրդավարության, իրավական պետության և սահմանադրականության սկզբունքների կոպտագույն խախտում են
Փաստաբան Զարուհի Փոստանջյանը հանդես է եկել հայտարարությամբ.
«2026 թվականի հունիսի 7-ին կայացած խորհրդարանական ընտրությունների նախնական արդյունքների ամփոփման փուլում վարչապետի պաշտոնը զբաղեցնող Նիկոլ Փաշինյանի կողմից հրավիրված մամուլի ասուլիսը և դրանում հնչած պնդումները հանդիսանում են ժողովրդավարության, իրավական պետության և սահմանադրականության սկզբունքների կոպտագույն խախտում։
Միանշանակ դատապարտելով այս վտանգավոր վարքագիծը՝ անհրաժեշտ է հանրության ուժերի ուշադրությունը հրավիրել մի շարք առանցքային խնդիրների վրա, որոնք փաստում են երկրում ստեղծված անդառնալի իրավիճակի մասին։ ՀՀ իրավապահ մարմնները պարտավոր են Նիկոլ Փաշինյանի հայտարարությունը պաշտոնապես գնահատել որպես իշխանության յուրացման փորձ և Սահմանադրական կարգի տապալում։
Այն պահին, երբ Կենտրոնական ընտրական հանձնաժողովը հասցրել էր մշակել ընդամենը 2005 տեղամասերից մոտ 530-ի քվեարկության արդյունքները, Նիկոլ Փաշինյանը, շրջանցելով պետական օրինական ընթացակարգերը, իրեն հռչակել է ընտրությունների հաղթող, ինչը հանդիսանում է իշխանության բացահայտ յուրացման փորձ։
Որևէ քաղաքական ուժ կամ անհատ իրավունք չունի սեփականացնելու ժողովրդի քվեն և իրեն հռչակելու միանձնյա կառավարություն ձևավորող՝ առանց ընտրական մարմնի վերջնական ու պաշտոնական արդյունքների հրապարակման, իսկ սեփական հաշվարկներին հղում անելը չի կարող փոխարինել պետական ինստիտուտների լեգիտիմ գործառույթներին։
Մինչ պաշտոնական արդյունքների ամփոփումը սեփական հաղթանակի մասին կանխավ հայտարարելը և պնդելը, թե «Քաղաքացիական պայմանագիրն» ավելի շատ ձայներ է ստացել, քան 2021 թվականին, ուղղակի և անթաքույց հոգեբանական ու քաղաքական ճնշում է ԿԸՀ-ի նկատմամբ։ Սրանով գործադիր իշխանության ղեկավարը կանխորոշում է ընտրությունների ելքը՝ հանձնաժողովին դնելով սեփական հայտարարությունները պարտադիր վավերացնելու փաստի առաջ, զրկելով նրան անկախ ու անկողմնակալ գործելու հնարավորությունից և այդպիսով ուղղակի ճնշում գործադրելով Կենտրոնական ընտրական հանձնաժողովի նկատմամբ։
Միաժամանակ, խիստ մտահոգիչ և դատապարտելի են ընդդիմադիրներին «բանտ նստեցնելու» վերաբերյալ բացահայտ սպառնալիքները և ընդդիմության առաջնորդներին պատասխանատվության ենթարկելու մասին հայտարարությունները, քանի որ ժողովրդավարական երկրում մեղավորության և պատասխանատվության հարցը որոշում է բացառապես անկախ դատարանը, այլ ոչ թե գործադիրի ղեկավարը՝ մամուլի ասուլիսի ժամանակ։
Ընդդիմության ստացած ձայները կանխավ «ընտրակաշառք» որակելը բացահայտ վիրավորանք է ընդդիմադիր ուժերին քվեարկած հարյուր հազարավոր ՀՀ քաղաքացիների հասցեին։
Նիկոլ Փաշինյանի պնդումը, թե հետընտրական գործընթացներն ու բողոքի ակցիաները բացառվում են, քանի որ դրանք հնարավոր են «միայն իշխանությունների կողմից ընտրությունների կեղծման դեպքում», հանդիսանում է քաղաքացիների՝ խաղաղ հավաքների և սեփական կամքն արտահայտելու սահմանադրական իրավունքի կոպիտ սահմանափակում։
Իշխանությունը չի կարող լինել սեփական գործողությունների միակ դատավորն ու կանխավ արգելել ընդդիմության իրավական ու քաղաքական քայլերը։ Այս ամենը վկայում է ուղղակի ատելության խոսքի, սպառնալիքների և քաղաքական տեռորի մասին, որը սկիզբ է առել նախընտրական քարոզարշավից դեռ ամիսներ առաջ և միտում ունի շարունակվելու։
Նիկոլ Փաշինյանի այս հայտարարությունները ևս մեկ անգամ ի ցույց են դնում պետական ինստիտուտների արժեզրկման և երկրում միանձնյա բռնապետական կարգեր հաստատելու վտանգավոր միտումները։
Ստեղծված իրավիճակում հրատապորեն պահանջվում է համապատասխան որոշման ընդունմամբ պատշաճ իրավական ու քաղաքական գնահատականի արժանացնել Նիկոլ Փաշինյանի հակաիրավական հայտարարությունը։
Կենտրոնական ընտրական հանձնաժողովից պահանջվում է ցուցաբերել բացառիկ սկզբունքայնություն, չտրվել գործադիր իշխանության կողմից հնչող քաղաքական հրահանգներին և իրականացնել ձայների անկախ, թափանցիկ ու օրինական հաշվարկ։
Միևնույն ժամանակ, կոչ է արվում միջազգային դիտորդական առաքելություններին և իրավապաշտպան կազմակերպություններին՝ անհապաղ ու պատշաճ գնահատական տալ բարձրագույն իշխանության կողմից ընտրությունների վերջնական արդյունքների վրա կատարված այս ակնհայտ ու անթաքույց ճնշմանը»։
Փաստաբան` Զարուհի Փոստանջյան
08.06.2026 թվական
Հետևեք մեզ Facebook-ում