Մի անհանգստացեք, իրենք չեն ունենա իրենց ուզած հաղթանակը. Սամվել Կարապետյան

«Ապօրինությունները շարունակվում են, անպայման առավոտյան վերջնական արյունքներն ունենալուց հետո հայտարարութամբ հանդես կգանք»,- ՀՀ-ում հունիսի 7-ի անցկացված համապետական ընտրություններից հետո, հունիսի լույս 8-ի գիշերը արված հատուկ ուղերձում հայտարարեց «Ուժեղ Հայաստան» դաշինքի առաջնորդ Սամվել Կարապետյանը։

Նա նշեց, որ այս ուշ ժամին ցանկանում է ներկայացնել խայտառակ ընտրությունների իրավիճակը։

«Դուք բոլորդ այս մեկ ամսում տեսաք, թե ինչ հալածանքների ենք մենք ենթարկվում, ինչ բռնությունների ենք մենք ենթարկվում, մեր թիմակիցներից մոտ 75 հոգի այսօր կալանավորված են, 700-ից ավելի մարդ ձերբակալված են։ Այս մարդիկ, նույնիսկ չհանգստանալով, որոշեցին ընտրության օրը անհասկանալի գործերով զբաղվել։ Աշխարհի պատմության մեջ նույնիսկ դեպք չի եղել, երբ հաշվարկի ժամանակ ընդհատում են և ասում են, թե առավոտյան 09․00-ին կներկայացնեն արդյունքները, տեսնելով, որ իրենց արդյունքները նվազում են խայտառակ կերպով։

Եվ ամեն րոպե նվազում են, իրենք կանգնեցրին հաշվարկը, և մենք նույնիսկ չենք հասկանում, թե առավոտյան ինչ են ներկայացնելու»,- ասաց Կարապետյանը՝ ընդգծելով, որ ընտրությունները դեռ չեն ավարտվել, ընտրական արդյունքները դեռ չկան։

«Ուստի մի անհանգստացեք, իրենք չեն ունենալու իրենց ուզած հաղթանակը, որովհետև իրենց հարցազրույցից, դեմքերի արտահայտությունից արդեն կռահեցիք, որ իրենց գործերը լավ չեն, իրենք, ընդամենը 30 տոկոս տվյալներ ունենալով, հայտարարում են, որ արդեն հաղթել են։ Բայց 30 տոկոսը գյուղական վայրերի արդյունքներն են, հենց սկսվեց քաղաքների արդյունքները, թվերը սկսեցին շատ մեծ թափով նվազել։ Դրա համար անցան հատուկ գործողությունների և մենք նույնիսկ պատկերացում չունենք՝ ինչ գործողությունների»,-ասաց Կարապետյանը։ Ուստի նա նշեց, որ ցանկանում է տեղյակ պահել՝ ապօրինությունները շարունակվում են, անհասկանալի ընտրություները շարունակվում են և անպայման առավոտյան վերջնական արյունքները ունենալուց հետո իրենք հայտարարութամբ հանդես կգան ընտրության արդյունքների մասին և նորից իրենց կարծիքը կհայտնեն։

«Տեսնում եք, որ նույնիսկ գիշերվա ժամը 00․00-ին Մեղրի ընտրատեղամաս տանում-լցնում են զինվորականներին, որ քվեարկեն։ Անպայման ցանկություն ունենալով հաղթել այս ընտրապայքարում, չունենալով դրա համար ոչ մի հնարավորություն և դա զգացին հենց սկսեցին արդյունքները հաշվել, հենց սկսեցին քաղաքների արդյունքները հաշվել»,-ասաց Կարապետյանը։