«Անկախ դիտորդ»-ը խախտումներ է արձանագրել ընտրատեղամասերի ավելի քան մեկ քառորդում

«Անկախ դիտորդ» դիտորդական  կազմակերպության տվյալներով,  ընտրությունների ընթացքում դիտարկված ընտրատեղամասերի 27%-ում տարբեր բնույթի խախտումներ են արձանագրվել, իսկ տեղամասերի 41%-ը գնահատվել է որպես ոչ մատչելի։ Այս մասին հայտնեց «Իրազեկ քաղաքացիների միավորում» ՀԿ-ի ծրագրերի համակարգող Դանիել Իոանիսյանը։

«Այս պահի դրությամբ մեր դիտորդները այցելել են շուրջ 1420 ընտրական տեղամաս կամ տեղամասերի ընդհանուր թվի մոտ 71%-ը»,- նշել է նա։

Ներկայացված տվյալների համաձայն՝ խախտումներ արձանագրվել են 387 տեղամասում։ Դրանցից 5.5%-ը եղել են ընթացակարգային, 4.5%-ը՝ քվեարկության գաղտնիության ապահովման հետ կապված, իսկ մոտ 4%-ում արձանագրվել են ընտրողների նկատմամբ վերահսկողության դրսևորումներ։

«Սա ընտրողի մոտ հոգեբանորեն վերահսկողության տպավորության ստեղծելու մասով է»,- ասել է դիտորդական առաքելության ներկայացուցիչը։

Իոաննիսյանի խոսքով՝ արձանագրված խախտումների շուրջ 20%-ը կատարվել է տեղամասային ընտրական հանձնաժողովների անդամների, ևս մոտ 20%-ը՝ վստահված անձանց կողմից։

Կուսակցական պատկանելիության առումով խախտումների 41%-ը վերագրվել է «Հայաստան» դաշինքի, իսկ 26%-ը՝ «Քաղաքացիական պայմանագիր» կուսակցության ներկայացուցիչներին։

Առաքելությունը նաև հայտնել է էլեկտրոնային գրանցման սարքերի աշխատանքի հետ կապված խնդիրների մասին։ Ըստ ներկայացված տվյալների՝ որոշ տեղամասերում սարքերը խոտանված կամ ճմրթված կտրոններ են տպել, իսկ մի շարք դեպքերում սարքի կողմից տպված համարը չի համապատասխանել ընտրողների թղթային ցուցակներում նշված համարին։

«51 տեղամասում սա հանգեցրել է քվեարկության գործընթացի կանգնեցմանը 40 րոպեով առավոտյան մինչև 08:40»,- նշել է Իոանիսյանը՝ հավելելով, որ նման տեխնիկական խնդիրը չպետք է հանգեցներ քվեարկության դադարեցման։

Դիտորդները խնդիրներ են արձանագրել նաև հանձնաժողովների անդամների պատրաստվածության, գրանցամատյանների վարման և ընտրողների հերթերի կազմակերպման հարցերում։ Առաքելության ներկայացուցչի խոսքով՝ ներկայումս իրականացվում է վիճակագրական վերլուծություն՝ պարզելու հերթերի առաջացման պատճառները։

Ըստ դիտորդների՝ հաճախակի են եղել նաև քարոզչական նյութերի կիրառման դեպքերը։ Վստահված անձինք ընտրատեղամասերում գտնվել են կուսակցական խորհրդանիշներով շապիկներով, գլխարկներով և կրծքանշաններով։

«Երբ խոսքը կրծքանշանի մասին է, մենք պահանջում ենք, որ հանձնաժողովի նախագահը միջամտի և այն հեռացվի։ Որպես կանոն՝ հեռացվում է»,- ասել է առաքելության ներկայացուցիչը։

Արձանագրվել են նաև դեպքեր, երբ ընտրատեղամասերում գտնվել են այնտեղ գտնվելու իրավունք չունեցող անձինք կամ գերազանցվել է նույն քաղաքական ուժի վստահված անձանց թույլատրելի քանակը։