Տոտալ հարձակում է ԲՀԿ տարածքային կառույցների, վստահված անձանց, շտաբերի պատասխանատուների նկատմամբ. Իվետա Տոնոյան
Օրը սկսվել է իրավապահ համակարգի ներկայացուցիչների տարբեր օղակների հարձակումով, մասնավորապես ԲՀԿ կուսակցության տարածքային կառույցների ներկայացուցիչների բերման ենթարկումներով, կալանավորումներով» ,- այս մասին քիչ առաջ ահազանգեց «Բարգավաճ Հայաստան» կուսակցության (ԲՀԿ) քաղխորհրդի անդամ Իվետա Տոնոյանը։
Տոնոյանը նշեց, որ վաղ առավոտից սկսվել է «տոտալ հարձակում Բարգավաճ Հայաստան կուսակցության տարածքային կառույցների, վստահված անձանց, շտաբերի պատասխանատուների նկատմամբ», և, ըստ նրա, մարզերում կուսակցության ներկայացուցիչները «տարատեսակ շինծու մեղադրանքներով մասսայաբար բերման են ենթարկվում»։
ԲՀԿ ներկայացուցիչը ընդգծեց, որ նման զարգացումները կանխատեսելի էին, քանի որ, նրա գնահատմամբ, «նախընտրական քարոզարշավի ամբողջ ընթացքում նման գործելաոճը պահպանվել է ընդդիմության ներկայացուցիչների նկատմամբ»։
Նա հավելեց, որ «անգամ ընտրության օրը այս ծավալով հետապնդումները շարունակվում են ընդդիմության ներկայացուցիչների նկատմամբ, սա արդեն որևէ տրամաբանության մեջ չտեղավորվող փաստ է»։
Իվետա Տոնոյանը նաև տեղեկացրեց, որ տարբեր ընտրատեղամասերից ստացվում են ահազանգեր՝ ուղղորդված քվեարկությունների, քվեաթերթիկների դուրսբերման փորձերի, ինչպես նաև ընտրատեղամասերի հարևանությամբ քարոզչական նյութերի տեղադրման վերաբերյալ՝«ունենք բազմաթիվ ահազանգեր, որ ընտրատեղամասերի հարևանությամբ տարատեսակ քարոզչական պաստառներ են տեղադրված, որը, ինչպես հայտնի է, օրենքի խախտում է»։
Նա նշեց նաև, որ կան տեղեկություններ ընդդիմադիր երեք կուսակցությունների առաջնորդների նկարներով քարոզչական թերթիկների տեղադրման մասին, և հավելել, որ «մեր արագ արձագանքման մասնագետները գնում են այս ահազանգի հետքերով»։
Տոնոյանի խոսքով՝ ԲՀԿ-ն ամբողջ օրվա ընթացքում հետևելու է արձանագրված բոլոր հնարավոր խախտումներին և հանդես է գալու համապատասխան հայտարարություններով։
Դիմելով քաղաքացիներին՝ նա ասաց. «Ես ուզում եմ դիմել ընտրական գործընթացին մասնակցող մեր հայրենակիցներին, մեր ժողովրդին, որ եթե իրենք արձանագրում են ընտրախախտումներ, ապա կարող են զանգահարել մեզ»։
Ամփոփելով իր խոսքը՝ ԲՀԿ քաղխորհրդի անդամը նշեց, որ իր գնահատմամբ՝ «այս ամենը ունի մեկ նպատակ՝ պարալիզացնել և խաթարել ընտրական գործընթացը Հայաստանում, խոչընդոտել ազգաբնակչության ազատ արտահայտման իրավունքը և վստահված անձանց գործունեությունը»։
Նա կոչ արեց քաղաքացիներին ակտիվորեն մասնակցել քվեարկությանը՝ հայտարարելով. «Այս ամենի միակ հակաթույնը մեր հայրենակիցների ակտիվ մասնակցությունը պետք է լինի։ Ես ուզում եմ մեր բոլոր հայրենակիցներին կոչ անել, խնդրել, հորդորել, որպեսզի այսօր՝ հունիսի 7-ին, անպայման գնան քվեարկության»։
Հետևեք մեզ Facebook-ում