Երբեք մի հարցրեք՝ հնարավոր է, թե անհնար։ Հարցրեք՝ անհրաժեշտ է, թե անհրաժեշտ չէ. Բագրատ Սրբազան

«Ոչ ակնկալել եմ, ոչ սպասել եմ, ոչ էլ որևէ կերպով հույս եմ փայփայել, որ կալանք խափանման միջոցը կփոխվի որևէ այլ միջոցով։ Ինձ համար անընդունելի են բոլոր տարբերակները»,- լրագրողների հետ զրույցում ասել է տնային կալանքի պայմաններում գտնվող  Բագրատ Արքեպիսկոպոս Գայստանյանը։

Հարցին, թե արդյոք մտովի համակերպվել էր կալանքի կարգավիճակի հետ, Սրբազանը պատասխանել է. «Չէի համակերպել, դա իմ պայքարի խրամատն էր»։

Անդրադառնալով այն հանգամանքին, որ տնային կալանքը պետք է կրի իր փաստաբան Տաթևիկ Սողոյանի բնակարանում, նա նշել է, որ իրենք այդ հասցեն չեն առաջարկել դատարանին։

«Մենք հասցե չենք տվել։ Իրենք էլ հանել են հասցեն նախորդից, և վերջին վայրկյանի որոշում է եղել, թե ուր գնանք»,- ասել է նա՝ հեգնանքով հավելելով. «Ինչպես գիտեք, ես շատ հարստություններ ունեմ, բազմաթիվ բնակարաններ և, ինչպես հայտնի պատմության մեջ ասում է, ագարակներ և այլն, և այլն»։

Խոսելով իր ինքնազգացողության մասին՝ Սրբազանը նշել է, որ իրեն հանգիստ է զգում և ընդգծել, որ իր համար տարածությունն ու ժամանակը երկրորդական նշանակություն ունեն։

«Ինձ համար կարևոր է, թե ես այդ տարածության ու ժամանակի վրա իշխանություն ունեմ, թե չունեմ։ Միշտ ես եմ ստեղծում իմ տարածությունը, իմ ժամանակը»,- ասել է նա։

Անդրադառնալով առաջիկա ընտրություններին՝ Բագրատ Սրբազանը քաղաքացիներին կոչ է արել ակտիվ մասնակցել քվեարկությանը։

«Շատ սիրով, բոլորը թող գնան ընտրության, ժամանակ տրամադրեն։ Սա ոչ միայն ձեր իրավունքի մասին է, այլ նաև պատասխանատվության մասին։ Մի՛ թողեք, որ ուրիշները ձեր կյանքի ուղին գծեն ձեզ համար։ Գնացեք, դուք ձեր որոշումը կայացրեք, ինչպիսին որ ուզում եք»,- նշել է նա։

Լրագրողի հարցին, թե ընտրություններով հնարավոր է արդյոք իշխանափոխություն իրականացնել Հայաստանում, Սրբազանը պատասխանել է. «Երբեք մի հարցրեք՝ հնարավոր է, թե անհնար։ Հարցրեք՝ անհրաժեշտ է, թե անհրաժեշտ չէ։ Անհրաժեշտ է, որ փոխվի»։

Միաժամանակ նա խուսափել է գնահատական տալ իր առաջնորդած շարժման արդյունքներին՝ նշելով, որ այդ թեմային կանդրադառնա ավելի ուշ։

«Հիմա այսօրվա թեման չի։ Հետո առիթ կլինի լայն, երկար կխոսենք ամեն ինչի մասին, թե ինչու չստացվեց կամ ինչ եղավ»,- ասել է նա։

Ապագա հնարավոր զարգացումների և ոստիկանության գործողությունների վերաբերյալ հարցին Սրբազանը պատասխանել է, որ այս պահին առաջնայինը ընտրություններին մասնակցելն է։

«Այս պահին մեզ համար կարևորագույն գործողությունը ընտրության գնալն է և ընտրություն կատարելն է՝ ոչ միայն իրավունքով, այլ նաև պատասխանատվությունը կրելով։ Հետագան ինչպես կընթանա, հաջորդ քայլը ցույց կտա։ Հիմա թող գա ժամանակը, ամեն ինչ իր ժամանակով»,- եզրափակել է Բագրատ Սրբազանը։