«Ամեն ինչ հողին է հավասարվել». Ստեփանավանում և հարակից գյուղերում ուժեղ կարկուտը մեծ վնասներ է հասցրել. սահմանվել է արտակարգ ռեժիմ

Լոռու մարզի Ստեփանավան քաղաքում և հարակից գյուղերում այսօր մոտ 15-20 րոպե  շարունակ՝ ուժեղ կարկուտ է տեղացել։ Կարկուտի չափն այնքան մեծ է եղել, որ ոչ միայն ցանքատարածություններն ու այգիներն են վնասվել, այլև ավտոմեքենաները։

Արմանիս բնակավայրի վարչական ղեկավար Սամվել Անտոնյանը News.am-ին  հայտնել է՝  այժմ  վնասների չափերն են փորձում պարզել, որպեսզի ներկայացնեն մարզպետարան։

«Գյուղացիները սիմիդ ունեին, այգիներ, ցորենի ցանքատարածություններ այս տարի շատ կային, ամեն ինչ հողին է հավասարեցրել կարկուտը, ես քաղաքում էի, ինձ զանգեցին, ասացին՝ հասի, մեքենադ կարկուտը ավիրեց։ Երևի ձվի մեծությամբ կարկուտ է եկել։ Նույնիսկ արևային ջրատաքացուցիչներն են վնասցվել, վնասները իրոք շատ մեծ են»,–հավելել է վարչական շրջանի ղեկավարը։

Կարկուտից մեծ վնասներ են կրել Ուրասար, Արմանիս գյուղերը, Ստեփանավան քաղաքը։
--

Այսօր տեղացած աննախադեպ կարկուտի պատճառած վնասները վերացնելու նպատակով՝ Ստեփանավանի համայնքապետարանն անցել է արտակարգ աշխատանքային ռեժիմի (հերթապահությունը կտևի մինչև ուշ երեկո)։

​Համայնքապետարանից հայտնում են.

«Համայնքի ղեկավար Արմեն Գրիգորյանի հանձնարարությամբ ստեղծվել է շտաբ և վնասները գույքագրող հանձնաժողով։

Համայնքապետարան-կառավարություն համագործակցության արդյունքում կառավարությունը պատրաստ է փոխհատուցել հասցված վնասները։

​​Հարգելի բնակիչներ, հարցերի համար կարող եք մոտենալ Ստեփանավանի համայնքապետարան կամ զանգահարել հետևյալ հեռախոսահամարներով.

​0256 2 22 33 | 0256 2 23 61

​098 00 04 48 | 099 35 54 50»։
--

 Panorama.am-ը հաղորդում է, որ Ստեփանավանում տեղացած աննախադեպ կարկուտը նախնական հսկայական նյութական վնասներ է պատճառել բնակիչներին։ Մոտ հավկիթի չափ խոշոր կարկուտը ավերել է տանիքներ, ավտոմեքենաներ, լուսամուտներ ու  մեծ վնաս հասցրել գյուղատնտեսությանը։

 «Մենք սնեց բան չէինք տեսել։ Էս չափի կարկուտ Ստեփանավանում դեռ չէր եղել, շատ-շատ է վնասը։ Ամուսնուս մեքենայի հետնամասն է ջարդվել, մեր խանութի դրսում մնացած տնտեսական ապրանքները, պլաստիկ էին, ամբողջը թափեցին աղբամանը։  Իսկ ընդհանուր քաղաքում ահռելի են վնասները, մարդիկ գալիս են  վրան են առնում, պլաշե կտորներ կամ հաստ ցելոֆաններ, որ տանիքները ծածկեն։ Տանիք չկունեն, պատմում են, որ  ջուրը  տուն  ա  լցվում, անկողինները ջրի մեջ են, պատուհաններն էլ է ջարդել։ Շատ ավտոններ ա  ջարդել։ Եթե մարդիկ չհասցնեին փախնել, մարդկանց էլ հաստատ կվնասեր։Ես սենց բան իմ կյանքում չեմ հիշում, էլի է վնասներով կարկուտ եկել, բայց էս ձևի՝ չէ»,- Panorama.am-ի հետ զրույցում պատմեց Ստեփանավան քաղաքի բնակիչը։

Բնակչի խոսքով՝ դեռ փորձում են իրենց վնասները հաշվել։

Ստեփանավանի քաղաքապետարանից Panorama.am-ին հայտնեցին, որ դեռ չկա վերջնական հաշվարկ, թե որքան է կազմում կարկտի հասցրած վնասը։ Սակայն նշեցին՝ վնասը մեծ է ՝ տանիքներ են վնասվել, ապակիներ, այգիներ, հողատարածություններ և այլն։ Տեղում աշխատանքներ են իրականացնում նաև  ՆԳՆ ՓԾ-ի և մարզպետարանի աշխատակիցները, ձևավորվել է շտապ հանձնաժողով՝ գույքագրման աշխատանքներն իրականացնելու համար։

Ստեփանավանի բժշկական կենտրոնից Panorama.am-ին հայտնեցին, որ կարկուտի հետևանքով տուժածներ ԲԿ չեն տեղափոխվել։