Քաղաքագետ. Խուզարկությունները կապված են «Ուժեղ Հայաստանի» երեկվա հանրահավաքի մարդաշատության հետ

«Ուժեղ Հայաստան» կուսակցության գրասենյակներում տեղի ունեցող լայնածավալ խուզարկությունները որևէ կապ չունեն իրավական գործընթացների հետ։ Panorama.am-ի հետ զրույցում նման համոզմունք հայտնեց քաղաքագետ Արմեն Բաղդասարյանը։

«Կարծում եմ՝ խուզարկությունները կապված են երեկվա հանրահավաքի մարդաշատության հետ, այն իշխանություններին բավականին լրջորեն մտահոգել է։ Կարծում եմ, որ իշխանությունները, որպես պահեստային տարբերակ, հող են նախապատրաստում, որպեսզի վերջին պահին արգելեն «Ուժեղ Հայաստան» կուսակցության մասնակցությունը խորհրդարանական ընտրություններին»,-մանրամասնեց քաղաքագետը։

Նա հիշեցրեց, ընտրական գործընթացում շատ է խոսվում մոլդովական սցենարի մասին, հենց Մոլդովայում հիմնական քաղաքական ուժերից մեկի մասնակցությունն արգելեցին բառացիորեն ընտրությունների նախորդ օրը։

«Այս իշխանությունները կարող են նույնը կրկնել նաև Հայաստանում»,-ասաց նա։

Քաղաքագետի խոսքով, իշխող ուժն անհանգստություններ ուներ վաղուց, այն պահից, երվ Նիկոլ Փաշինյանը սկսեց ակտիվորեն շփվել ժողովրդի հետ։

«Իր համար էլ ակնհայտ էր, որ իրենց համար իրավիճակն այնքան էլ լավ չէ, ինչպես իրենք պատկերացնում էին։ Դրա համար իշխանությունը պատրաստում էր Պլան Բ, պլան Գ տարբերակները։ Այս ամեն ինչը իրավական գործընթացների հետ կապ չունի, որովհետև իրավական պետության սկզբունքն այն է, որ օրենքի առջև պետք է հավասար լինեն բոլորը, բայց մենք տեսնում ենք, որ այպես չէ։ Օրենքը գործում է միայն ընդդիմության դեմ, իսկ իշխանություններին ամեն բան կարելի է»,-ասաց Ա. Բաղդասարյանը։