Ոչ թե որձ առյուծի վանդակ, այլ դատարան. Գագիկ Ծառուկյանը Նիկոլ Փաշինյանից պահանջում է հերքում, ներողություն, մլն-ավոր դրամների փոխհատուցում

Հունիսի 7-ին կայանալիք խորհրդարանական ընտրություններին մասնակցող «Բարգավաճ Հայաստան» կուսակցության առաջնորդ Գագիկ Ծառուկյանը երեկ՝ հունիսի 2-ին հայց է ներկայացրել դատարան ընդդեմ Հայաստանի վարչապետի պաշտոնը զբաղեցնող Նիկոլ Փաշինյանի։

ԲՀԿ առաջնորդը դատարանից պահանջում է պարտավորեցնել պատասխանող Նիկոլ Փաշինյանին հայցադիմումը բավարարելու մասին վճիռն օրինական ուժի մեջ մտնելուց հետո 5 (հինգ) աշխատանքային օրվա ընթացքում ՀՀ-ում գործող զանգվածային լրատվության միջոցների համար հասանելի վայրում և առնվազն 24 (քսանչորս) ժամ առաջ այդ մասին ԶԼՄ-ներին նախապես ծանուցելով հրապարակայնորեն հերքել Գագիկ  Ծառուկյանի հասցեին տարածված զրպարտություն համարվող փաստացի տվյալները` հերքումն իրականացնելով հետևյալ կերպ.

«ՀԵՐՔՈՒՄ, 28.05.2026 թվականին տված ճեպազրույցիս ընթացքում Գագիկ Ծառուկյանի՝ «հանցագործ», «շպիոն», «գործակալ» լինելու, «հանցավոր գործարք կնքած լինելու», «Հայաստանի ժողովրդին թալանելու», «օտարերկրյա հատուկ ծառայության ցուցումով Անդրանիկ Թևանյանին ԲՀԿ ցուցակում ներառելու» վերաբերյալ հրապարակված տվյալները չեն համապատասխանում իրականությանը՝ սուտ են»:

ԲՀԿ առաջնորդի ներկայացուցիչը պահանջել է ապահովել հերքման վերաբերյալ հրապարակված տեսանյութի և հերքման տեքստի հրապարակումը և տարածումը Մի շարք լրատվամիջոցներով։

Միաժամանակ, Գագիկ Ծառուկյանը դատարանից պահանջել է պատասխանող Նիկոլ Փաշինյանից հօգուտ հայցվոր Գագիկ Կոլյայի Ծառուկյանի բռնագանձել 6.000.000 (վեց միլիոն) ՀՀ դրամ՝ որպես զրպարտությամբ պատճառված վնասի փոխհատուցում:

Պարտավորեցնել պատասխանող Նիկոլ Փաշինյանին հայցադիմումը բավարարելու մասին վճիռն օրինական ուժի մեջ մտնելուց 5 (հինգ) աշխատանքային օրվա ընթացքում հայցապահանջի 1-ին կետում նշված կարգով և պայմաններով հրապարակայնորեն ներողություն խնդրել Գագիկ Ծառուկյանից՝ հետևյալ կերպ.Ներողության հրապարակում․

«Ես՝ Նիկոլ Փաշինյանս, ներողություն եմ խնդրում Գագիկ Ծառուկյանից 2026 թվականի մայիսի 28-ին ճեպազրույցիս ժամանակ Գագիկ Ծառուկյանի վերաբերյալ հնչեցված՝ Գագիկ Ծառուկյանի պատիվն ու արժանապատվությունն արատավորող արտահայտությունների համար, մասնավորապես ներողություն եմ խնդրում Գագիկ Ծառուկյանին շպիոն, գործակալ, հանցագործ անվանելու համար»։ Հայցվոր կողմը պահանջել է դատարանից նաև ապահովել ներողության վերաբերյալ հրապարակված տեսանյութի և ներողության տեքստի հրապարակումը և տարածումը մի շարք ԶԼՄ-ներով։

Միաժամանակ հայցվորը պահանջել է պատասխանող Նիկոլ Փաշինյանից հօգուտ հայցվոր Գագիկ Ծառուկյանի բռնագանձել 3.000.000 (երեք միլիոն) ՀՀ դրամ՝ որպես վիրավորանքի արդյունքում պատճառված վնասի փոխհատուցում:

Պատասխանող Նիկոլ Վովայի Փաշինյանից հօգուտ հայցվոր Գագիկ Ծառուկյանի բռնագանձել հայցվորի կատարված և կատարվելիք դատական ծախսը՝ նախապես վճարված պետական տուրքի գումարը՝ 310.000 (երեք հարյուր տասը հազար) ՀՀ դրամ և փաստաբանի խելամիտ վարձատրության գումարը (պայմանագիրը և հաշվարկը կներկայացվեն հավելյալ):

Հայցադիմումը մակագրվել է Երևանի քաղաքացիական դատարանի դատավոր Նաիրա Ավետիսյանին։