Ինչպե՞ս են մեկնաբանում ադրբեջանական մամուլում Անդրանիկ Թևանյանի կալանավորումը

Ադրբեջանական մամուլը լայնորեն մեկնաբանեց Փաշինյանի որոշումը՝  նախընտրական փուլում կալանավորել «Մայր Հայաստան» կուսակցության առաջնորդ Անդրանիկ Թևանյանին։

Ընդ որում, եթե սկզբում մեկնաբանությունները չոր բնույթ էին կրում, ապա հետո սկսեցին բացատրություններ ման գալ, քանի որ գիտեն, որ նման մեղադրանքները ակնհայտորեն քաղաքական դրդապատճառներով էին պայմանավորված։

Այդ իսկ պատճառով, ադրբեջանցի ընդդիմադիր շրջանակները նշում էին, որ Հայաստանն իր ավտորիտար վարկանիշով մոտենում է Ադրբեջանին, իսկ իշխանամետ շրջանակները, հասկանալով, որ նման մեղադրական ձևակերպումներով, հիմնականում դատապարտում էին իրենց ընդդիմադիր շրջանակներին, սկսեցին այն վարկածը առաջ բերել, որ Թևանյանին Փաշինյանը կարող է մեղադրանք առաջադրել Զելենսկու խնդրանքով։

Մասնավորապես, ադրբեջանական haqqin.az–ը նշում է, որ Թևանյանը, ի տարբերություն Հայաստանի այլ վարկաբեկված «ռուսամետ»  առաջնորդների, համարվում է «նոր սերնդի քաղաքական գործիչ». նրա քաղաքական վերելքը սկսվել է 44-օրյա պատերազմից հետո։

2021 թվականին նա արտահերթ խորհրդարանական ընտրություններում ընտրվեց պատգամավոր Ռոբերտ Քոչարյանի «Հայաստան» դաշինքից։

Սակայն 2023 թվականին Թևանյանը հրաժարվեց իր մանդատից՝ Երևանի քաղաքային խորհրդի ընտրություններում առաջադրվելու համար, ստեղծելով «Մայր Հայաստան» ընդդիմադիր դաշինքը, որը քաղաքային ընտրություններում հավաքեց ձայների 15 տոկոսը։ Նա ակտիվորեն մասնակցեց Նիկոլ Փաշինյանի դեմ ուղղված «ռևանշիստական» (ադրբեջանցիների ձևակերպումն է) ​​բողոքի ցույցերին և մի քանի անգամ ձերբակալվեց ոստիկանության կողմից։

2024 թվականի սեպտեմբերին Թևանյանը այցելեց Ուկրաինայի Դոնբասի  շրջան, այց, որը լայնորեն լուսաբանվեց ռուս քարոզիչների կողմից: Նախկին պատգամավորը հանդիպեց «ԴԺՀ»-ի և «ԼԺՀ»-ի ղեկավարների հետ, հայտարարեց, որ Հայաստանի և Ադրբեջանի միջև խաղաղությունը «հնարավոր է միայն Ռուսաստանի երաշխիքով» և խոսեց «հայերի Ղարաբաղ վերադարձի և նրանց հատուկ կարգավիճակ տրամադրելու» մասին:

«ԴԺՀ» կատարած այցի ընթացքում  Թևանյանը  քննարկել էր Ռուսաստանի և Հայաստանի   միջև հարաբերությունների զարգացումը։  Նաև նշել,   Հայաստանում «ուկրաինական սցենարի» կրկնությունը կանխելու կարևորությունը։

Ըստ ադրբեջանական վերլուծաբանների՝ Թևանյանի այս այցը, բնականաբար դուր չէր եկել Ուկրաինայի ներկայիս իշխանություններին, որոնք էլ, հավանաբար, իրենց դժգոհությունը ներկայացրել էին Փաշինյանին։

Ադրբեջանցի վերլուծաբանների այս վարկածը առաջնային դարձավ նաև այն պատճառով, որ պարզվում է, Զելենսկին նույնանման խնդրանքով դիմել էր Ալիևին՝ Ուկրաինային հանձնել Բաքվի բանտում գտնվող հայ միլիարդատեր՝ Ռուբեն Վարդանյանին։

Սակայն, ըստ ադրբեջանցի ընդդիմադիր շրջանակների, Թևանյանին Փաշինյանը ձերբակալեց այն փուլում, երբ Հայաստանում անցկացվում են խորհրդարանական ընտրություններ, և Թևանյանը ԲՀԿ–ի երկրորդ համարն էր, որն համարվում է Հայաստանի ազդեցիկ ուժերից մեկը, որը կարող է հայտնվել երկրի ապագա ԱԺ–ում։

Այս պարագայում, ըստ ադրբեջանցի վերլուծաբանների, Փաշինյանը փորձում է ազատվել իր վտանգավոր մրցակցից, միաժամանակ, անուղղակի բավարարելով նաև Զելենսկու ցանկությունը։

Բացի այդ, Փաշինյանն այս քայլով, փորձում է մեսիջ ուղարկել իր արևմտյան գործընկերներին, որ իր վիճակը ծանր է, և Մոսկվան «հիբրիդային գրոհ է» սկսել իր դեմ, և եթե նույնիսկ ինքը պարտվի, ապա դրա մեղքը նույնպես կարելի կլինի բարդել Մոսկվայի վրա։

Ադրբեջանցիները հիշեցնում են, որ նման ձևով անցյալ տարի Ռումինիայի հաղթած նախագահի հաղթանակը հեչ արվեց։

Քանի որ Թևանյանի ձերբակալումն ունի իր ուրույն սպեցիֆիկան, Ադրբեջանի, թե իշխանամետ, և թե ընդիմադիր շրջանակները, փորձում են ավելի զուսպ լինել իրենց մեկնաբանություններում։

Սակայն գրեթե ոչ ոք չի  կասկածում, որ այս ձերբակալությունը միանշանակ քաղաքական խնդրով է պայմանավորված, իսկ թե ինչքանով է այստեղ խառնված Զելենսկու գործոնը, արդեն քիչ հետաքրքիր է, եթե հաշվի առնենք, որ Փաշինյանն այս քայլին գնացել է հենց ընտրարշավի ընթացքում։

Սա է  իրականությունը։

Արտակ Հակոբյան
Zham.am