Լեբեդև. ԵԱՏՄ գագաթաժողովում կբարձրացվի Հայաստանի և ԵՄ հարաբերությունների թեման

Հայաստանի և Եվրասիական տնտեսական միության հարաբերությունների թեման՝ ԵՄ-ի հետ նրա մերձեցման համատեքստում, կքննարկվի Եվրասիական բարձրագույն տնտեսական խորհրդի (ԵԲՏԽ) նիստում, որը տեղի կունենա մայիսի 29-ին Աստանայում։ Այս մասին հայտնել է ԱՊՀ գլխավոր քարտուղար Սերգեյ Լեբեդևը։

«Ընդհանրապես, որքան գիտեմ, քննարկում է ընթանում։ Իհարկե, այնտեղ անդրադառնում են ԵԱՏՄ, ԵՄ թեմային, բայց դա արդեն հայտնի կդառնա նեղ կազմով նիստի արդյունքներով», - ասել է նա «Վեստի»-ին տված մեկնաբանությունում՝ կարծիք հայտնելով, որ հարցը «կքննարկվի բարեկամական մթնոլորտում»։

Այնուամենայնիվ, ինչպես նշել է նա, հարցը սկզբունքային է։ «Սկզբունքորեն հարցը դրվում է այսպես՝ դուք ընտրում եք ԵԱՏՄ-ն, թե՞ ԵՄ-ը։ ԵՄ-ը չափազանց երկար պատմություն է. շատ երկրներ ցանկանում են մտնել ԵՄ, ԵՄ-ին անդամակցելու գործընթացը տարիներ է ձգվում։ Իսկ ԵԱՏՄ-ն իրականություն է, որից հիմա հնարավոր չէ երես թեքել։ Ինչպես Հայաստանի վարչապետ Նիկոլ Փաշինյանն ու բազմաթիվ այլ գործիչներ արդեն հայտարարել են, ներկայում ոչ ոք չի պատրաստվում խզել կապերը ԵԱՏՄ-ի հետ։ Հետևաբար, համագործակցությունը կշարունակվի։ Իսկ ինչ վերաբերում է ԵՄ-ին, ապա դեռ կտեսնենք», - հավելել է Լեբեդևը։ Երևանը վերջին շրջանում հայտարարում է Եվրոպական միության հետ ինտեգրման կուրսի մասին։

Հայաստանի խորհրդարանը 2025 թվականի մարտի 26-ին երկրորդ և վերջնական ընթերցմամբ ընդունել է հանրապետության՝ Եվրոպական միությանն անդամակցության գործընթացի մեկնարկի մասին օրենքը։ Միևնույն ժամանակ, Փաշինյանը պնդում է, որ Երևանը մտադիր չէ դուրս գալ ԵԱՏՄ-ից և ակնկալում է համատեղել կազմակերպությանն անդամակցությունն ու ԵՄ-ին ինտեգրումը այնքան ժամանակ, քանի դեռ դա հնարավոր կլինի։ Ինչպես նշել է Ռուսաստանի նախագահ Վլադիմիր Պուտինը, ԵՄ-ի հետ ինտեգրումը ինքնաբերաբար հանգեցնում է Հայաստանի և ԵԱՏՄ փոխգործակցության դադարեցմանը, ինչպես նաև դրան ուղեկցող բոլոր արտոնությունների կորստին, որոնցից Երևանը շահել է Եվրասիական տնտեսական միությունում գտնվելու ամբողջ ընթացքում։