Մինչ Փաշինյանը «օդ է տատանում», Նախիջևանի Օրդուբադի շրջանում պատրաստվում են «Վերադարձ Արևմտյան Ադրբեջան» խորագրով 3-րդ փառատոն-կոնգրեսին

Ադրբեջանական պաշտոնական լրատվամիջոցների փոխանցմամբ՝ հունիսի 18-19-ին Նախիջևանի Օրդուբադի շրջանում տեղի է ունենալու «Վերադարձ Արևմտյան Ադրբեջան» խորագրով 3-րդ փառատոն-կոնգրեսը։

Միջոցառումը կազմակերպվում է Ադրբեջանի գիտության և կրթության նախարարության, Նախիջևանում նախագահի լիազոր ներկայացուցչության, Նախիջևանի պետական համալսարանի և «Արևմտյան Ադրբեջանի համայնք» կազմակերպության համատեղ ջանքերով։ Այսինքն՝ պետական ամենաբարձր մակարդակով:

Նշվում է, որ կոնգրեսի ընթացքում «գիտնականներ, հետազոտողներ և հասարակական գործիչներ կներկայացնեն զեկույցներ Արևմտյան Ադրբեջանի իրողությունների, նրա պատմական ժառանգության և վերադարձի հեռանկարների վերաբերյալ»։
Իսկ մշակութային հատվածում կազմակերպվելու են ցուցահանդեսներ, որոնք արտացոլելու են «Արևմտյան Ադրբեջանի» ազգային և մշակութային արժեքները: Ինչպես նշվեց սա նմանատիպ արդեն 3-րդ միջոցառումն է (առաջինը կայացել է 2023-ին Նախիջևան քաղաքում, երկրորդը՝ 2024-ին Բատաբատում)։ 3-րդ փառատոնի համար Օրդուբադի ընտրությունը պատահական չէ և ունի ռազմավարական-քաղաքական ենթատեքստ. Օրդուբադը Նախիջևանի ամենաարևելյան շրջանն է, որն անմիջապես սահմանակից է Հայաստանի Հանրապետության Սյունիքի մարզին (Մեղրի) և Իրանին։ Սա այն տարածքն է, որով Ադրբեջանը փորձում է առաջ տանել «Զանգեզուրի միջանցքի» իր նարատիվը։ Օրինակ, Azertag.az լրատվական կայքում  նշվում է, որ փառատոնը կանցկացվի «Զանգեզուրի միջանցքում» գտնվող Օրդուբադ քաղաքում:
Օրդուբադում այսպիսի փառատոնի կազմակերպմամբ Ադրբեջանը տեսանելի և խորհրդանշական կապ է ստեղծում Նախիջևանի և Սյունիքի միջև՝ փորձ անելով վերջինս ներկայացնել որպես «պատմականորեն ադրբեջանական բնակավայր»։
Դժվար չի հասականլ (եթե ՔՊ վարչության անդամ չեք, իհարկե), որ «Վերադարձ Արևմտյան Ադրբեջան» 3-րդ փառատոն-կոնգրեսը արտացոլում է Ադրբեջանի իշխանության ագրվեիս, զավթողական նպատակները և այն, որ Ալիևը չի հրաժարվել Հայաստանը գրավելու և հայությանը բնաջնջելու իր ֆաշիստական նպատակներից: Իսկ չի հրաժարվել, որովհետև Հայաստանում կա Փաշինյանի գլխավորածի նման իշխանություն: