«Մի հատ նշան ա կպցրել դոշին, ոնց որ ծովից ծովը Հայաստանը հետ ա բերել». Գագիկ Ծառուկյան

Ցանկացած քաղաքակիրթ հասարակությունում երկրի ադեկվատ, հավասարակշռված և ստեղծարար ղեկավարը ոչ թե ճոխություն է, այլ նորմա, սակայն ներկայիս իշխանությունը երկիրը կանգնեցրել է կոտրած տաշտակի առաջ և կարողանում է միայն սպառնալիքներ հնչեցնել, վիրավորանքներ տեղալ ու անվերջ քրեական գործեր հարուցել։ Այս մասին մայիսի 23-ին Երևանի Արաբկիր վարչական շրջանում լրագրողների հետ զրույցում հայտարարել է «Բարգավաճ Հայաստան» կուսակցության առաջնորդ Գագիկ Ծառուկյանը։

Պատասխանելով նախորդ օրը քարոզչական միջոցառումների բացակայության պատճառների մասին լրագրողների հարցին՝ քաղաքական գործիչը պարզաբանել է, որ ամբողջ քարոզարշավը միտումնավոր դադարեցվել էր՝ հանուն դպրոցների շրջանավարտների։ Ծառուկյանն ընդգծել է, որ «Վերջին զանգը» հանրապետության հույսի, լույսի և ապագա սերնդի տոնն է, ուստի կուսակցությունը որոշել էր չմիջամտել իր քաղաքական օրակարգով և հնարավորություն տալ երեխաներին ու նրանց ծնողներին լիարժեք տոնել այդ օրը։ Անդրադառնալով Նիկոլ Փաշինյանի չդադարող հարձակումների թեմային՝ Ծառուկյանը նշել է, որ ամբողջ հասարակությունն արդեն ծայրաստիճան հոգնել է վարչապետի աթոռը զբաղեցնող մարդու ագրեսիվ վարքից։ 

Կուսակցության ղեկավարն արձանագրել է, որ Փաշինյանը կառավարման ութ տարիների ընթացքում չի իրականացրել իր խոստումներից և ոչ մեկը, ամբողջությամբ տապալել է կառավարումը և այժմ փորձում է իշխանության մնալ բացառապես ձերբակալությունների, ստի և քաղաքացիներին ահաբեկելու հաշվին։

Գագիկ Ծառուկյանը խոր մտահոգություն է հայտնել, որ Փաշինյանը Հայաստանը տանում է նույն կործանարար սցենարով, որը նախկինում հանգեցրել է Արցախի լիակատար կորստին, տարածքների հանձնմանը և մարդկային ահռելի զոհերին։ Քաղաքական գործիչը սուր է մեկնաբանել վարչապետի նոր նախընտրական ատրիբուտը՝ կրծքին Հայաստանի ուրվագծերով նշանը։ Ծառուկյանը հեգնանքով նկատել է, որ Փաշինյանն այդ խորհրդանիշով այնպես է շրջում, կարծես ծովից ծով Հայաստանը հետ է բերել, մինչդեռ իրականում կրծքին կրում է հենց իր կողմից մասնատված և թուլացած Հայաստանի պատկերը, քանի որ բովանդակային առումով մարդկանց ասելու բացարձակապես ոչինչ չունի։ 

Ծառուկյանի խոսքով՝ արտաքին քաղաքականությունն ամբողջությամբ քայքայված է, բոլոր գործընկերների հետ հարաբերությունները փչացած են, իսկ ռեժիմը շարունակում է հանձնել ինքնիշխան հողերը և տարածաշրջանին բերում է միայն նոր սպառնալիքներ։ Կուսակցության առաջնորդը Արաբկիրի ընտրողներին կոչ է արել հունիսի 7-ի քվեարկությանը մոտենալ առավելագույն պատասխանատվությամբ և ընտրություն կատարել հօգուտ ստեղծարար ուժերի, որոնք կարող են Հայաստանը դուրս բերել այս խոր փոսից։
Աղբյուր՝ News.am