Գերմանիան կվավերացնի Հայաստան-Եվրամիություն համաձայնագիրը կառավարության ձևավորումից հետո. Մաթիաս Քիսլեր

Գերմանիայի համար Հայաստանի և Եվրամիության միջև ստորագրված ընդլայնված համագործակցության մասին փաստաթուղթը խնդրահարույց չէ: Tert.am-ի հետ զրույցում ասաց Հայաստանում Գերմանիայի արտակարգ և լիազոր դեսպան Մաթիաս Քիսլերը:

Պատասխանելով այն հարցին, թե ե՞րբ է Գերմանիան նախատեսում վավերացնել այս համաձայնագիրը, Մաթիաս Քիսլերը պատասխանեց. «Մենք կփորձենք վավերացնել այս փաստաթուղթը` որքան հնարավոր է շուտ: Բայց, ինչպես գիտեք, գտնվում ենք նոր կառավարության ձևավորման փուլում: Մի քանի շաբաթ հետո մենք կունենանք նոր կառավարություն: Այս գործընթացը մի քանի օր է նախատեսում, ինչից հետո կկայացնենք որոշում և Գերմանիայի Բունդեսթագում հարցը քննարկելուց հետո այն կվավերացվի: Այս գործընթացը ժամանակ է պահանջում: Մենք ակտիվ աշխատում ենք այս ուղղությամբ»:

Դեսպանը հավաստիացրեց՝ իրենք չեն տեսնում խոչընդոտներ փաստաթուղթը չվավերացնելու համար: «Հարցը խորհրդարանում կքննարկվի, կարծում եմ, որ պատգամավորները հարցեր կունենան, բայց ես չեմ տեսնում որևէ խնդիր այս համաձայնագիրը չվավերացնելու համար»,- նշեց Մաթիաս Քիսլերը:

Հիշեցնենք, որ Արևելյան գործընկերության գագաթաժողովի շրջանակներում Հայաստանի և Եվրամիության միջև ստորագրվեց Համապարփակ և ընդլայնված գործընկերության համաձայնագիրը: Այն ստորագրեցին Հայաստանի արտգործնախարար Էդվարդ Նալբանդյանը և Եվրամիության միասնական արտաքին քաղաքականության և անվտանգության հարցերով բարձր ներկայացուցիչ Ֆեդերիկա Մոգերինին` Հայաստանի նախագահ Սերժ Սարգսյանի և Եվրամիության խորհրդի նախագահ Դոնալդ Տուսկի ներկայությամբ։

Ներկայումս փաստաթուղթը գտնվում է վավերացման փուլում: Եվրամիության անդամ բոլոր պետությունները համաձայնագիրը պետք է ստորագրեն, ինչից հետո այն կմտնի ուժի մեջ:

Համաձայնագիրն արդեն ստորագրվել է Էստոնիայի կողմից:

Տիգրանուհի Մարտիրոսյան

Tert.am