Փաստացի իրականությունը Փաշինյանի նախընտրական երևակայության դեմ

Սյունիքի մարզի Տեղ գյուղում բնակիչների հետ հանդիպման ընթացքում ՔՊ ղեկավար Նիկոլ Փաշինյանը հանդես եկավ սոցիալական ոլորտի վերաբերյալ մի շարք հայտարարություններով՝ ընդգծելով, որ պետության քաղաքականության արդյունքում թոշակառուների վիճակը «աննախադեպ բարելավվել է»։

«Սիրելի թոշակառուներ, ձեր թոշակը բարձրացել է։ Անկանխիկ առևտուր եք անում, հետվճար եք ստանում։ Հայաստանի պատմության մեջ առաջին անգամ միջին կենսաթոշակը ավելի բարձր է, քան սպառողական զամբյուղը։ 65 պլյուս քաղաքացիները առողջության ապահովագրություն ունեն։ Այսօր, երբ թոշակառուն հիվանդանում է, նրա կողքին երկու աթոռ կա․ մեկին նստած է հարազատը, մյուսին՝ պետությունը», - նշեց Փաշինայնը։

Հանդիպման ընթացքում նա նաև նշել է, որ թոշակները բարձրացել են միջինում շուրջ 10 հազար դրամով, իսկ անկանխիկ գնումների դեպքում, վարչապետի խորին համոզմամբ, քաղաքացիները ստանում են նաև հետվճար՝ ըստ ամսվա՝ 5 հազարից մինչև 10 հազար դրամի սահմաններում։

Սակայն այս հայտարարությունների ֆոնին պաշտոնական տվյալները ներկայացնում են այլ պատկեր:

2026 թվականի ապրիլի դրությամբ Հայաստանում միջին կենսաթոշակը կազմում է մոտ 59,200 դրամ, իսկ նվազագույն կենսաթոշակը՝ 46,000 դրամ։

Միևնույն ժամանակ, ըստ Վիճակագրական կոմիտեի հրապարակումների՝ նվազագույն սպառողական զամբյուղը հաշվարկվում է երկու տարբեր մեթոդաբանությամբ՝ Համաշխարհային բանկի և Առողջապահության նախարարության մոտեցումներով։

Համաշխարհային բանկի մեթոդաբանությամբ 2025 թվականի չորրորդ եռամսյակում նվազագույն սպառողական զամբյուղը մեկ մեծահասակի հաշվով կազմել է 68,784 դրամ, ինչը փաստացի բարձր է թե՛ միջին, թե՛ նվազագույն կենսաթոշակներից։

Այս տվյալների համադրությունը ցույց է տալիս, որ կառավարության կողմից ներկայացվող «կենսաթոշակը գերազանցել է սպառողական զամբյուղը» ձևակերպումը վիճարկելի է և կախված է հաշվարկի մեթոդից։ Պաշտոնական վիճակագրությունը փաստում է, որ զգալի մասի թոշակառուների եկամուտները շարունակում են մնալ սպառողական նվազագույն կարիքների սահմանագծից ցածր կամ դրա սահմաններում, հաղորդում է News.am-ը:
--
Իսկ առհասարակ, կա ստուգելու ավելի գործուն և արդար տարբերակ: Բոլոր այն պաշտոնյաներին, ներառյալ հարկատուների հաշվին ապրող Փաշինյանին պետք է հատկացնել 46 հազար դրամ, ու հետևել, թե 1 ամիս ինչպես է այդ գումարով «ձգում»: Ու եթե երկու ամիս «կձգի», թող այն ժամանակ էլ խոսի «աննախադեպ բարելավումից»: