Խորեն Լևոնյանը փակագծեր է բացել, թե ինչու է հեռացել Հանրային հեռուստաընկերությունից

«Նոր տարվա ֆիլմի նկարահանումների ժամանակ ինձ առաջարկեցին ձայն կարդալ։ Տեքստը նայելուց հետո հասկացա, որ ինձ սազական չէ, որովհետև  ոնց որ ձեռք առնես այն ամեն ինչը, ինչ 15 տարի ստեղծել ես՝ նկատի ունեմ «Երգ երգոցը», և իմ պայմանագրի մեջ չկա կետ, որ ինչ-որ բան պետք է անեմ»,- այս մասին Tete A Tete հաղորդման ժամանակ հայտարարել է դերասան Խորեն Լևոնյանը՝ խոսելով Հանրային հեռուստաընկերությունից հեռանալու մասին։

Նա նշեց, որ ինքն ընդամենը ծառայություններ մատուցող է։

«Տարբեր պրոդյուսերներ էին կապվում ինձ հետ, որ տեքստը կարդամ, ես ասացի՝ խնդիր չկա, քանի որ Հանրայինն ինձ համար տան պես տեղ է, 25 տարի այնտեղ եմ աշխատում, մի երկու բան խմբագրենք, որովհետև նկատեցի միտում՝ ոնց որ ձեռք առնեն իմ հայերեն խոսքը, և գուսանների, աշուղների տարիների աշխատանքը։ Ես ասացի՝ խմբագրեք այս ամենը, և ես կկարդամ, խնդիր չկա։ Ասացին՝ չէ, չի լինի։ Ես էլ ասացի՝ չեմ կարդա, խմբագրեք»,- պատմել է Խորեն Լևոնյանը՝ չնշելով կոնկրետ անուններ։ 

Հաղորդավարն իր խոսքում նշել է, որ իր տեղեկություններով պետք է հայտարարեր՝ «դիմավորենք՝ գուսան Լիդուշիկ»։ 

«Չգիտեմ՝ քեզ որտեղից այդ ինֆորմացիան, բայց մոտավորապես այդպես»,- արձաքագնել է Լևոնյանը։ 

«Երբ նկարահանումներին  երկու-երեք օր էր մնացել, զանգեցի պարզաբանելու՝ կա՞ նկարահանում, ասացին՝ չէ, ժողով է եղել, որտեղ բացեիբաց քննարկել են ինձ, ասել են՝ այս բանը չի արել մեզ համար, և որոշել են իմ թեկնածությունը դնեն հեռացման համար։

Հիմա «Երգ երգոցի» կրկնություններն են ցույց տալիս, որպեսզի չգիտեմ՝ ինչ լինի։ «Երգ երգոցում» աշխատում էին 50-ից ավելի երաժիշտներ...»,-ասել է Լևոնյանը։

Հարցին՝ անձնական կոնֆլիտ կա՞ր ձեր և Հանրային հեռուստաընկերության տնօրեն Հովհանենս Մովսիսյանի միջև, Լևոնյանը պատասխանել է. «Անձնական կոնֆլիկտ ունենալու համար պետք է այդ մարդուն տեսնես։ 5 տարի աշխատել եմ, կարծում  եմ՝ մեկ անգամ եմ տեսել, բարևել, ինչպես եք, հաջողություն։ Ոչ մի անձնական բան։

Իհարկե, վստահ եմ, ես նորից կլինեմ եթերում, կվերադառնամ այնտեղ, որտեղից սկսել եմ, երբեք չեմ փոխել ալիքը, 25 տարի միայն այդ ալիքում եմ աշխատել, ոնց որ հարազատ օջախ լինի»։