Վրաստանի կառավարությունը սխալ ուղղությամբ է շարժվում․ Կայա Կալլաս

Վրաստանի կառավարությունը ցանկանում է անդամակցել ԵՄ-ին, սակայն շարժվում է սխալ ուղղությամբ, քանի որ Եվրոպան միայն աշխարհագրություն չէ, այլ արժեքներ և սկզբունքներ։ Այս մասին Երևանում, Եվրոպական քաղաքական համայնքի գագաթնաժողովի մեկնարկից առաջ, հայտարարել է Եվրոպական միության արտաքին գործերի և անվտանգության քաղաքականության գերագույն հանձնակատարը։

«Անշուշտ, Երևանում անցկացվող այս գագաթնաժողովը ևս մեկ անգամ փաստում է Կովկասի կարևորությունը, հատկապես հիմա, երբ Իրանում պատերազմ է ընթանում։ Մենք խոսում ենք կապուղիների, բայց նաև այն սպառնալիքների նկատմամբ դիմակայունության մասին, որոնց առջև կանգնած ենք։ Ինչ վերաբերում է Վրաստանի և Եվրոպայի հարաբերություններին, ապա աշխարհագրությանն ուղղված հայացքն արդեն հուշում է, թե որ երկրներն են այստեղ գտնվում։ Հետևաբար, քննարկումներ են ընթանում, թե ինչ կարող ենք անել «Միջին միջանցքի» կապուղիների հարցում առաջ շարժվելու համար», - նշել է նա։ Կալասը նաև հավելել է. «Մենք Վրաստանի հարցում որոշակի մտահոգություններ ունենք։ Չնայած Եվրամիությանն անդամակցելու մասին հնչող հայտարարություններին՝ տեսնում ենք, որ երկրի կառավարությունը գործնական քայլեր չի ձեռնարկում և իրականում սխալ ուղղությամբ է ընթանում։ Այս հանգամանքը մեզ ստիպում է որոշակի սահմանափակումներ կիրառել, այդ թվում՝ վերանայել ֆինանսավորում հատկացնելու հարցը»։
Աղբյուր՝ News.am