Մակրոնի արյունոտ ձեռքերն ու ցինիկ ժպիտը

Ֆրանսիայի նախագահ Մակրոնը եկել է մեր բակը։ Դա այն Մակրոնն է, որի ձեռքը կրակն է ընկել Ֆրանսիան, քանզի գլոբալիզմի և հիվանդագին ծրագրերի զոհ է դարձել։

Ֆրանսիան Մակրոնից շուտով կազատվի, բայց մենք դեռ երկար կտառապենք Մակրոնի ու նրա հետինների արածների պատճառով։

Մակրոնը շրջում է Երևանի փողոցներով, ժպտում անցորդներին։ Որոշ անցորդներ փոխադարձաբար ժպտում են նրան, գոռում են «Մակղո՜ն, Մակղո՜ն» և ձգտում սելֆիի։

Սելֆիի ձգտող հայերը լավ չեն պատկերացնում, որ Մակրոնով հիանալը, նրա հետ նկարվելը նույնն է, ինչ 1915 թվականից հետո որևէ հայ ձգտեր նկարվել Թալեաթի կամ Էնվերի հետ։

Մակրոնը և նրա գործընկերները Նիկոլ Փաշինյանի ձեռքերով հանձնեցին Արցախը։ Տեղի ունեցավ էթնիկ զտում։ Մակրոնի ձեռքերն արյունոտ են։ Ինչպես որ Նիկոլինը։

2022 թվականին Մակրոնն ու մյուսները, իրենց հակառուսական հաշվարկներից ելնելով, որոշեցին Արցախը հանձնել Ադրբեջանին։ Նիկոլը համաձայնեց՝ դիմացը ստանալով վարչապետի աթոռին մնալու աջակցություն։ Հիմա մակրոններն այդ աջակցության համար են եկել Հայաստան, բայց նորից գին են ուզում։ Այս անգամ Հայաստանի տեսքով։ Նիկոլն էլի համաձայն է։ Ծաղրածու Զելենսկուն էլ որպես սադրիչ հրավիրել են՝ Հայաստանի ուկրաինացման նպատակով։

Դե հիմա բացատրեք խնդրում եմ, թե ինչո՞ւ են ոմանք հիացած Մակրոնով։ Եթե Մակրոնով հիացած եք, ուրեմն հիացած եք Արցախի կորստով։ Ուրեմն հիացած եք 120 հազար արցախցու էթնիկ զտմամբ։ Հիացած եք Էնվերով, Թալեաթով, Ջեմալով, Նազիմով։

Փառք Աստծո, որ շատ քիչ են այդ հիացածները։ Մակրոնները կգան ու կգնան, մենք մեր երկրին տեր պետք է կանգնենք։ Առաջին քայլը՝ Նիկոլին հեռացնելն է։ Մնացածը լուծվող հարցեր են։

Կորյուն Մանուկյան
7or.am