Փաշինյանը Հայաստանում դենացիֆիկացիա և դեմիլիտարիզացիա է իրականացնում, դրա համար պետք է ցանկացած արդարացում գտնի Ադրբեջանի գործողությունները Արցախում արդարացնելու համար․ Ստեփան Դանիելյան

Ստեփանակերտի եկեղեցու ոչնչացման արդարացումը լիովին տեղավորվում է շարունակվող կապիտուլյացիայի հետևանքների՝ դենացիֆիկացիայի և դեմիլիտարիզացիայի շրջանակում։ Այս մասին «Փաստինֆոյի» հետ զրույցում ասաց քաղաքագետ, «Մայր Հայաստան» կուսակցության վարչության անդամ Ստեփան Դանիելյանը՝ անդրադառնալով Փաշինյանի հիպոթետիկ վերացական օրինակի՝ Արծվաշենում կառուցված մզկիթի քանդման հնարավորությանը։

«Դեմիլիտարիզացիա նշանակում է, որ պետք է Հայաստանը հրաժարվի իր բոլոր խորհրդանիշներից, որոնք ինչ-որ կերպ կարող են հակադրվել Ադրբեջանին՝ անցյալից, պատմությունից և այլ ոլորտներից։ Դեմիլիտարիզացիա նշանակում է նաև, որ բոլոր այն անձինք, որոնք մասնակցել են պատերազմին, պետք է հայտնվեն բանտերում, իսկ այն մարդիկ, որոնք իրենց կյանքը տվել են Հայաստանի և Արցախի համար, չպետք է հերոսացվեն․ այսինքն՝ դպրոցներում նրանց նկարները պետք է հանվեն, հուշարձաններ չլինեն և այլն»,–ասաց նա։

Նա ընդգծեց, որ, իր գնահատմամբ, դենացիֆիկացիայի և դեմիլիտարիզացիայի նման գործընթաց իրականացվում է, որի դիմաց, ըստ նրա, փորձ է արվում ապահովել իշխանության պահպանումը։

Դանիելյանի խոսքով՝ դենացիֆիկացիան պետք է դիտարկվի ոչ միայն Հայաստանում, այլ նաև Արցախում։

«Արցախում դենացիֆիկացիան ոչ միայն այն է, որ հայերը պետք է լքեին երկիրը և ենթարկվեին էթնիկ զտման, այլ նաև պետք է ոչնչացվեն բոլոր հայկական հետքերը՝ եկեղեցիները, գերեզմանատները, հուշարձանները, այսինքն՝ այն ամենը, ինչը կարող է հիշեցնել, որ այնտեղ ժամանակին հայեր են ապրել»,–նշեց նա։

Նրա խոսքով՝ քանի որ, ըստ իր գնահատման, իշխանությունը չի հակադրվում այդ գործընթացներին, ապա մշտապես կարող է գտնվել որևէ ձևակերպում կամ արդարացում դրանց համար՝ իշխանությունը պահպանելու նպատակով։