«Նիկոլը եվրոպացի առաջնորդներին ակվարիումի մեջ է պահելու Համալիրում, որ իրական հայերի չտեսնեն». Արմեն Աշոտյան

Հայաստանի Հանրապետական կուսակցության փոխնախագահ Արմեն Աշոտյանն այսօր մամուլի ասուլիսի ժամանակ ասաց, որ ՀՀԿ-ը մշակել է միջոցառումների ծրագիր, որպեսզի օգտագործի եվրոպական հանրույթի Հայաստանում գտնվելու փաստը՝ բարձրաձայնելու համար 2 բլոկ խնդիրներ։

Առաջինը՝ Հայաստանում ժողովրդավարության իսկական վիճակը, այն է՝ ժողովրդավարության բացակայությունը և Արցախ՝ իր բոլոր բխող խնդիրներով։ Այդ խնդրի մեջ մտնում է արցախահայերի վերադարձի իրավունքը։

«Խոսքը միայն արցախահայերի վերադարձի իրավունքի մասին չէ, մենք չպետք է մոռանանք, թե ինչու է արցախահայությունը հայտնվել Հայաստանում, որովհետև ենթարկվել է էթնիկ զտման, ինչը ցեղասպանական գործողություն է։ Այսինքն՝ արցախահայության իրավունքների պաշտպանության առաջին բազային փուլն իր մեջ ներառում է միջազգային գործող մեխանիզմներով ու հնարավորություններով այդ էթնիկ զտման՝ ցեղասպանական գործողության հետ կապված դիվանագիտական ու քաղաքական ջանքերը։ Այո, հետո վերադարձի իրավունք, նյութագույքային իրավունք, շատ կարևոր՝ հոգևոր-մշակութային ժառանգության պահպանության ու պաշտպանության իրավունք։ Եվ, իհարկե, հայ ռազմագերիների հարցը Բաքվում, այդ թվում՝ Արցախի ռազմաքաղաքական ղեկավարության պատանդառում»,- նշեց Արմեն Աշոտյանը։

ՀՀԿ փոխանախագահի խոսքով՝ այս միջոցառոմներն իրենց մեջ ներառելու են՝ ինչպես բովանդակային, մասնագիտական հարթակներ, այստեղ դիմել ու առաջարկել են տարբեր հասարակական կազմակերպություններին, որպեսզի իրենք եթե կարիքը կա, ստանձնեն առաջամարտիկի դերը։ Օրինակ, մի քանի լեզվով պատմեն Հայաստանում առկա իրավիճակի մասին՝ փաստաբանների, իրավապաշտպանների, իրավաբանների, ԶԼՄ ներկայացուցիչների շուրթերով։ Այդ ընթացքում իրականացվելու են նաև քաղաքացիական ակցիաներ, որոնք իրենց մեջ կրելու են հենց այդ իմաստը՝ դեմոկրատիայի ճգնաժամ և Արցախ, որպես խնդիր հայ ազգի համար։

«Գիտեք, որ հայաստանյան մի շարք կուսակցություններ անդամակցում են եվրոպական տարբեր ընտանիքների, և մեր առաջարկությունների մեջ կա նամակի նախագիծ, որը մոտ օրերս կքննարկենք այլ գործընկերների հետ: Դրա գաղափարը հետևյալն է՝ անկախ մեր քաղաքական տարաձայնություններից Հայաստանի ներսում, անկախ նրանից, թե մենք ինչ գաղափարական հիմքով որ քաղաքական ընտանիքի անդամ ենք, պետք է միասնական դժգոհության և իրականության ձայն բարձրացնենք։ Առաջարկելու ենք այդ նամակի տակ միացյալ ստորագրահավաք անենք»,- հավելեց Արմեն Աշոտյանը։

Այնուհետև Արմեն Աշոտյանը նշեց, որ մայիսի 5-ին ԵՄ-Հայաստան գագաթնաժողով է նախատեսված, այդ ժամանակ նույնպես կլինեն բողոքի ու դժգոհությունների ակցիաներ։ Առաջարկներով ՀՀԿ-ն սկսել է բանակցել, կոնսուլտացիաներ անցկացնել ընդդիմադիր քաղաքական ուժերի հետ։ Առնվազն խոսակցությունների մակարդակով, ընդդիմադիր գործընկերները, ում հետ հասցրել են հանդիպել, բոլորը համաձայնել են ընդունել առաջարկը։

«Մեր ընդդիմադիր գործընկերները համաձայնել են, որ սա հնարավորություն է Նիկոլի կազմակերպած նախընտրական խնջույքը վերածել Նիկոլի և նիկոլական Հայաստանի մասին ճշմարտության պահի, և սա հնարավոր է անել։ Հնարավոր է անել, անգամ հաշվի առնելով այս «սուպեր սեքյուրիթի» վիճակը։ Մարզահամերգային համալիրում է միջոցառումը լինելու, փորձելու են Մարզահամերգային համալիրը և շրջակայքը սարքել ակվարիում և չթողնել, որպեսզի մարդիկ շփվեն իրական հայերի հետ, իսկական քաղաքացիների հետ»,- ընդգծեց Արմեն Աշոտյանը։

Հիշեցնենք, որ մայիսի 4-ին Երևանում տեղի կունենա Եվրոպական քաղաքական համայնքի գագաթնաժողովը:

Մանրամասները՝ 168.am-ի տեսանյութում