Դանիել Իոաննիսյանը հուշեց վիճահարույց օրենսդրական փոփոխությունների մասին, ինչպե՞ս է սխալ օրենքը ստորագրվել նախագահի կողմից

Նրա հրապարակային հուշումից հետո ՔՊ-ում գործի են անցել։ ԿԸՀ-ում էլ ընդունում են, որ խնդիրը բացահայտվել է օրեր առաջ։

Ըստ քաղհասարակության ներկայացուցչի և ԿԸՀ մամուլի խոսնակի, խնդիրն առաջացել է տեխնիկական սխալի, ինչու ոչ նաև անփութության հետևանքով, երբ 2024-ին քննարկվել է Ընտրական Օրենսգրքի 81 հոդվածի 2-րդ մասի մի նախադասություն չեղյալ հայտարարելը,  սակայն դեկտեմբերի 5-ի քվեարկությամբ չեղյալ է հայտարարվել պարբերությունը, արդյունքում քաղաքական ուժի անվանման մեջ անձնանունի օգտագործման արգելքը չի ընդգրկվել ԸՕ-ում։

«Տեխնիկական խնդրի հետևանքով ստորագրման է հասել «2-րդ մասի 2-րդ պարբերությունն ուժը կորցրած ճանաչել» ձևակերպմամբ։ Չգիտեմ՝ ո՞նց, ինչի՞ հետևանքով, «նախադասությունը» փոխվել է,  դարձել է «պարբերություն»։ Մի քանի օր է, ինչ մենք բոլորս տեղեկացել ենք խնդրի մասին։ Մենք էլ չենք նկատել նախկինում, որ նման խնդիր կա»,-Panorama.am-ի հետ զրույցում ասաց ԿԸՀ մամուլի խոսնակ Սեդա Ղուկասյանը։

Նրա խոսքով, օրենսդրական փոփոխությունների վերաբերյալ ԿԸՀ-ն ձեռնպահ կմնա դիրքորոշում հայտնելուց։

Դանիել Իոաննիսյանը Panorama.am-ի հետ զրույցում ասաց, ֆեյսբուքյան գրառումը կատարելու պահին նման փոփոխությունների նախագիծ չի եղել, ավելի ուշ դրանք լրացրել են անվավեր քվեաթերթիկների վերաբերյալ իրենց առաջարկությունների նախագիծը։

«Ոչ թե ես տեղյակ էի, կամ տեղյակ չէի, այլ առհասարակ նման նախագիծ չկար։ Ես չեմ կարծում, միակն էի, որ մտածել էր ԸՕ-ում այդ դրույթը  փոխվել է։ Նման էքսկլյուզիվ կարծիքի չեմ իմ մասին, որ ուրիշ ոչ մեկ չէր բացել ու չէր նայել օրենքը»,-նշեց Դ. Իոաննիսյանը։

Ի դեպ, գրառման մեջ նա մեղադրում է ԿԸՀ-ին, որն անձնանունների օգտագործման արգելքը հանող օրենսդրական առաջարկություն է ներկայացնում, սակայն ավելի ուշ պարզել է, որ տեղի ունեցածը պատահական սխալի արդյունք է։

Խորհրդարանական ընտրություններից ուղիղ երկու ամիս առաջ նման օրենսդրական փոփոխությունների նախաձեռնումը ինչպե՞ս է գնահատում  ՀԿ ներկայացուցիչը։

«Ոչ համարում ենք սարսափելի մի բան, քանի որ հետ ենք բերում այն կարգավորումը, որը պատահաբար դուրս է եկել, մյուս կողմից՝ ոչ էլ ողջունում ենք, քանի որ եթե կարգավորումը պատահական է դուրս եկել, կարգավորումը կարգավորում է, դրա բացակայությունը կարգավորման բացակայություն է։ Դաշինքներում անձնանունների  բացառման  կարգավորումները  մենք չենք նախագծել, մենք դրանք, ըստ էության, ոչ ողջունում ենք, ոչ էլ քննադատում; Չենք կարծում, որ ընտրություններից առաջ, առավել ևս որ արդեն կա կոնկրետ ուժ, որ հայտարարել է, որ իր դաշինքի անվան մեջ լինելու է անձնանուն, լավ միտք է։ Մյուս կողմից էլ  դրա մեջ սարսափելի բան  չենք տեսնում, եթե  դա կես տարի առաջ արվեր, մենք դա կողջունեինք, բայց քանի որ հիմա է արվում, չենք ողջունում,  ոչ էլ առանձնապես շատ ծանր ենք տանում»,-ասաց «Անկախ դիտորդ» առաքելության ներկայացուցիչը։

Քաղտեխնոլոգ Արմեն Բադալյանը Panorama.am-ի հետ զրույցում ընդգծեց՝ փոփոխություններն ուղղված են «Ուժեղ Հայաստան Սամվել Կարապետյանի հետ» դաշինքի դեմ, դրանք ժողովրդավարության հետ կապ չունեցող գործընթացներն են։ Զարգացումներից կախված  կերևա, դա մոլդովական սցենարի մա՞ս է, թե՞ ոչ։

«ՔՊ-ն իր հիմնական մրցակից է համարում «Ուժեղ Հայաստան Սամվել Կարապետյանի հետ» դաշինքին, եթե հանվում է Սամվել Կարապետյանի անունը, մնում է «Ուժեղ Հայաստան»։ Բայց քանի որ Սամվել Կարապետյանն է ընտրողների մոտ ասոցացվում որպես ապագա լիդեր, նրանք  իրենց քվեն տալու էին ոչ թե «ուժեղ Հայաստանին», այլ Սամվել Կարապետյանին։ Ընդունելով նման օրենսդրական կարգավորում, իրենք ընտրողին կարող են զրկել տվյալ քաղաքական ուժին ձայն տալու հնարավորությունից»,-ասաց քաղտեխնոլոգը։

Հեղինակ՝ Լալա Տեր-Ղազարյան