18-ամյա Դավիթը թույլ է, կանգնել չի կարողանում, մորը թույլ չեն տալիս տեսակցել. փաստաբան (տեսանյութ)

18–ամյա Դավիթ Մինասյանին տեսակցել եմ, բայց բժշկական տեսանկյունից որևէ նորություն չունենք, բժիշկներին չեմ կարողացել տեսնել, մենք այս երկու-երեք օրը աշխատել ենք թողնենք, որ իրենք իրենց աշխատանքը անեն, որևէ ձևով չմիջամտենք կամ դա չդիտարկվի միջամտություն։ Այս մասին NEWS.am–ի հետ զրույցում հայտնել է փաստաբան Լուսինե Մարտիրոսյանը։

«Իր վիճակը նույն է, փոփոխություն չկա, շատ ուժեղ գլխացավեր ունի, և ոնց հասկացա՝ այդ անոթի հետ է պայմանավորված։ Թուլություն, շատ ուժեղ գլխացավեր, գլխապտույտ, այսինքն չի կարողանում նաև կանգնել։ Երբ իրեն բերեցին այստեղ, այդ օրը ուներ շնչահեղձություն, ուշագնացություն, եղունգները սևացած էին։ Ինքը այդ մասերը անգամ չէր էլ զգում, չէր էլ հասկանում, թե ինչ է կատարվում, որովհետև ահավոր վիճակում էր մինչև հիվանդանոց բերելը»,–ասաց նա։

Փաստաբանը տեղեկացրեց, որ մինչև այս պահը տեսակցությունների սահմանափակումը առկա է. «Այսինքն անգամ մորը չի թույլատրվում տեսակցել երեխային։ Ոչ մի նորություն չունենք նորություն գլխավոր դատախազությունից, Մարդու իրավունքների պաշտպանի գրասենյակից։ Ինչպես գիտեք դասընկերները անձամբ անգամ էդ երեխաներն էին դիմել մարդու իրավունքների պաշտպանին, խնդրել էին ընդունելություն, էդ ընդունում, օգնությունը տենց էլ տեղի չունեցավ։ Էս պահի դրությամբ դեռ որևէ տեղաշարժ, ինչ-որ մի դրական լուր չունենք»,–ասաց նա։

Ավելի վաղ NEWS.am–ը հայտնել էր, որ մարտի 29–ին, Սուրբ Աննա եկեղեցում Փաշինյանի մասնակցությամբ միջադեպ է եղել, Փաշինյանի թիկնապահները նախ հրելով ճանապարհ են բացել, իսկ երբ երիտասարդը նշել է, որ ցանկացել է իր տեղում կանգնած մնալ՝ վեճ է եղել։ Ավելի ուշ ոստիկանները ուժի կիրառմամբ եկեղեցուց բերման ենթարկեցին երիտասարդներին։ Այս գործով 3 անձ ձերբակալվել է, նրանից երկուսը 18 տարեկան երկվորյակ եղբայրներ են՝ Դավիթ ու Միքայել Մինասյանները, երրորդը հասարակական գործիչ Գևորգ Գևորգյանն է։ Փաստաբան Լուսինե Մարտիրոսյանի խոսքով եղբայրներն ունեն բանտարկության հետ անհամատեղելի հիվանդություն։

18–ամյա դպրոցական Դավիթ Մինասյանը 2 ամսով կալանավորվել է, Նրա եղբայր Միքայել Մինասյանը ազատ է արձակվել, նրա նկատմամբ կիրառվել է չբացակայելու արգելք խափանման միջոցը։ Նույն գործող անցնող հասարակական գործիչ Գևորգ Գևորգյանը ևս ազատ էր արձակվել 5 մլն գրավի դիմաց։ Կալանավորումից հետո Դավիթ Մինասյանի ինքնազգացողությունը վատացել է, գիտակցության կորուստ է ունեցել, որից հետո նրան տեղափոխել են նախ «Աբովյանի» ԲԿ, ապա «Նաիրի» ԲԿ։