Սերժ Սարգսյանը բացատրեց, թե ինչու են որոշել չմասնակցել առաջիկա ընտրություններին

«Մենք չենք մասնակցելու խորհրդարանական ընտրություններին, բայց ՀՀԿ-ն քաղաքական զարգացումների կիզակետում շարունակելու է մնալ պայքարի առաջամարտիկներից մեկը»,- ՀՀԿ համագումարում ունեցած ելույթում ասաց ՀՀ երրորդ նախագահ, ՀՀԿ նախագահ Սերժ Սարգսյանը։

Նա նշեց, որ լավ աշխատանքի դեպքում ՀՀԿ-ն կհաղթահարեր անհրաժեշտ 4 տոկոսի շեմքը, բայց գիտի  մեկ այլ ճշմարտություն՝ «մեզ իշխանափոխություն է  պետք, մեզ չի հետաքրքրում մի քանի մանդատ ունենալու հեռանկարը»։

«Մենք չենք մասնակցում այս ընտրություններին, որպեսզի էլ ավելի չպառակտենք ընդդիմադիր դաշտը, հնարավորություն տանք  սեփական խոստումները կյանքի կոչելու բոլոր այն ուժերին, որոնց թվում է, թե իբր իրենց նշած նախկինները խանգարում են իշխանափոխություն անել»,- նշեց նա։

Սարգսյանի խոսքով, ՀՀԿ ընտրողների ձայները չեն կորչելու, այլ միանալու են ընդդիմադիր ուժերին ընտրողների ձայներին՝ նպաստելով այս իշխանության վերարտադրման կասեցմանը։

«Հանրապետականները և մեր համակիրները, գրեթե առանց բացառությունների, պատրաստվում են մասնակցել ընտրություններին և քվեարկել միայն ու միայն ընդդիմադիր քաղաքական ուժերի օգտին, մեր ընտրողների ձայները չեն կորելու, այլ միանալու են ընդդիմադիր ուժերին ընտրողների ձայներին»,-ասաց ՀՀ երրորդ նախագահը։ 

Նա նշեց, որ այս որոշումն իրենց հեշտ չի տրվել բայց կասկած չունի, որ դրա համար երբեք չեն ամաչելու, այլ դառնալու են Հայաստանի ժամանակից քաղաքական պատմության մեջ «կուսակցությանս հետ, բայց ազգիս համար» գաղափարախոսոիթյամն գործելու լավագույն օրինակ։

Սերժ Սարգսյանն առաջարկ արեց ընդդիմությանը՝ որպես մոտակա ժամանակահատվածում համատեղ պայքարի գործնական քայլեր. «Մայիսի 4-5-ը Երևանում կայանալու է երկու խոշոր միջոցառում՝ Եվրոպական քաղաքական համայնքի գագաթնաժողովը, ապա ՀՀ-ԵՄ առաջին գագաթնաժողովը։

Այս միջոցառումների օրերին մեզ վստահեք համատեղ ձեռնարկումներ մշակելու և իրականացնելու գործը։ Մի քանի տասնյակ բարձրաստիճան պատվիրակությունների՝ օրենքի և եվրոպական քաղաքական մշակույթի շրջանակում պետք է ներկայացնել ամբողջ իրականությունը Հայաստանի ժողովրդավարության մասին։

Այն, ինչ այսօրվա ռեժիմը պլանավորել է որպես նախընտրական խնջույք, պետք է և կարող է դառնալ ընտրություններից առաջ մեր երկրի դառը իրականությունը ներկայացնելու առիթ՝ ճշմարտության պահ»։

Նա նշեց, որ ՀՀԿն կարող է համակարգել այս ամենը մյուս ընդդիմադիր ուժերի հետ համագործակցությամբ, եթե, իհարկե նրանց կհետաքրքիր նման առաջարկը։ 

Մանրամասն՝ տեսանյութում։ 
Աղբյուրը` Panorama.am