Ռուսաստանն առաջարկներ ունի Հայաստանի համար ատոմային էներգիայի վերաբերյալ. Լիխաչև

Ռուսաստանը Հայաստանին կներկայացնի երկրում ատոմային էներգիայի զարգացման վերաբերյալ առավելագույն հարմարավետ առաջարկները, լրագրողներին հայտարարել է «Ռոսատոմ»-ի գլխավոր տնօրեն Ալեքսեյ Լիխաչևը, հաղորդում է РИА Новости-ն։

Լիխաչևը հայտնել է, որ Հայաստանի ատոմակայանի շահագործման ժամկետն՝ արդիականացումից հետո, որը կիրականացնի «Ռոսատոմ»-ը, կերկարաձգվի մինչև 2036 թվականը։ Միաժամանակ նա կարծիք է հայտնել, որ դա «որոշակի սահման» է, որից հետո մի շարք պատճառներից ելնելով, հազիվ թե հնարավոր լինեն շարունակել աշխատանքները հայկական ատոմակայանում։

«Իհարկե, դժվար չէ հաշվարկել, որ ընդամենը տասը տարի է մնացել ոչ միայն ընդունելու, այլև իրականացնելու համար Հայաստանում նոր բազային էլեկտրակայանների կառուցման մասին որոշումները։ Մենք բազմիցս համապատասխան առաջարկներ ենք ներկայացրել Հայաստանի կառավարությանը՝ ինչպես բարձր, այնպես էլ միջին և փոքր հզորության բլոկների վերաբերյալ։ Այդ լուծումներից յուրաքանչյուրն ունի իր առավելություններն ու մարտահրավերները, սակայն վերջնական խոսքը միշտ պատկանում է հաճախորդներին»,- հայտարարել է Լիխաչևը։

Ըստ նրա՝ հենց Հայաստանի կառավարությունը պետք է որոշի երկրի էներգետիկ համակարգի փոխդասավորությունը և ընդհանուր զարգացման հեռանկարները։

«Իմ ընկալմամբ՝ Հայաստանը չի կարող գոյություն ունենալ առանց միջուկային էներգիայի։ Բայց հարցը նույնիսկ այն չէ, որ այն անհրաժեշտ է, այլ այն, որ երկիրը տարիներ շարունակ տիրապետում է այդ իրավասությանը»,- պարզաբանել է «Ռոսատոմի» ղեկավարը՝ հավելելով, որ Հայաստանը 1970-ականների վերջից ի վեր խաղաղ միջուկային տեխնոլոգիաների կրող է, և այդ առավելությունը չպետք է ձեռքից բաց թողնել։

Լրագրողների հետ զրույցում Լիխաչովը հավելել է, որ Ռուսաստանի նախագահ Վլադիմիր Պուտինի և Հայաստանի վարչապետ Նիկոլ Փաշինյանի հանդիպման ժամանակ կարող են քննարկվել այդ հարցի լուծման վերաբերյալ Հայաստանի կառավարության ներկայացրած կոնկրետ խնդրանքները։

«Ես ոչ միայն հավատում եմ, այլև լիովին վստահ եմ, որ Ռուսաստանը առավելագույն հարմարավետ առաջարկներ կանի, քանի որ մեզ միավորել է տասնամյակների շատ կառուցողական համագործակցությունը, մեզ միավորում են եղբայրական, իսկ շատ ընտանիքներում՝ ազգակցական հարաբերությունները»,- շարունակել է նա՝ նշելով, որ Հայաստանի էներգետիկ անկախությունն անհնար է առանց միջուկային էներգիայի, և որ, իր կարծիքով, ռուսական լուծումները պետք է մոտ ապագայում պահանջարկ վայելեն։
Աղբյուր՝ News.am