Լեգենդար հետախույզն ի՞նչ գիտե, թե 44-օրյա պատերազմից առաջ Աննա Հակոբյանն ինչու՞ որոշեց կամուֆլյաժով ֆոտոսեսիաներ անել Արցախում. Հակոբ Բադալյան

«Աննա Հակոբյանը սխալ չի ասում: Լեգենդար հետախույզ Կանդազն ի՞նչ գիտե 44-օրյա պատերազմի մասին: Նա ի՞նչ գիտե, օրինակ, թե 44-օրյա պատերազմից կարճ ժամանակ առաջ հենց Աննա Հակոբյանն ինչու՞ որոշեց կամուֆլյաժով ֆոտոսեսիաներ անել Արցախի տեսարժան վայրերում»,-գրում է քաղաքական վերլուծաբան Հակոբ Բադալյանը՝ արձագանքելով Արթուր Ավանեսյանի վերաբերյալ Փաշինյանի նախկին կողակցի հայտարարություններին։

Բադալյանը շարունակում է.

«Կամ, Կանդազն ի՞նչ գիտե, թե ինչ հանդիպումներ ու քննարկումներ է ունեցել Նիկոլ Փաշինյանը, ի՞նչ հաղորդագրություններ են փոխանակվել Հայաստանի եւ Ադրբեջանի ԱԱԾ-երի միջոցով, ի՞նչ են խոսել Նիկոլ Փաշինյանն ու Իլհամ Ալիեւը, որ Ալիեւը չէր կրակում երկու տարի: Կանդազն այդ մասին շատ բան չգիտե, որովհետեւ Նիկոլ Փաշինյանի կողքին եղել է ոչ թե Կանդազը, այլ Աննա Հակոբյանը:

Իսկ 44-օրյա պատերազմը միայն այն չի եղել, ինչ եղել է մարտադաշտում: 44-օրյա պատերազմը ունեցել է հսկայական քաղաքական հետնաբեմ, ու այդ հետնաբեմից՝ այո, Աննա Հակոբյանն ավելի է տեղյակ, քան լեգենդար հետախույզ Կանդազը: Ընդ որում, 44-օրյա պատերազմն իր այդ հետնաբեմով իրականում շարունակվել է նաեւ նոյեմբերի 9-ից հետո: Եվ, օրինակ Կանդազն ի՞նչ գիտե, թե ինչու՞ էր Արցախի հայաթափման վերջին ակտից շատ կարճ ժամանակ առաջ Աննա Հակոբյանն այս անգամ էլ ֆոտոսեսիա անում Էյնշտեյնի խոսքերը պատկերող շապիկով ու գրքով՝ թե «ճամպրուկով իրերը միակ բանը չէ, որ իր հետ բերում է փախստականը»:

Իհարկե, Աննա Հակոբյանը շատ ավելին գիտե արցախյան ողբերգության հետնաբեմի մասին:

Հարցն այն է միայն, թե հայ հանրության առաջ երբեւէ կբացվի՞ արցախյան 44-օրյա պատերազմի, ու դրան հաջորդած իրադարձությունների հետնաբեմը, , թե՞ ոչ:

Իսկ Կանդազը՝ լեգենդար հետախույզ է, որը գիտե, թե ինչ է մարտադաշտը, ինչ է մարտը, ինչ է մարտական խնդիրն ու այն լուծելը, ինչ է սեփական հող պաշտպանելը, ինչ է՝ կյանքն ու կռիվը: Կանդազը ապրել ու կռվել է մարտադաշտում, ոչ թե հետնաբեմում»։