Հենց Լուսնե Բադալյանը, որ այդպես գրում է, թող մի հանդիպում կազմակերպի և զրուցի Միքայելի,Դավիթի հետ, իր բոբիկ վիճակից ամոթով հետ կդառնա․ ծնող

Բողոքի ակցիա ՆԳՆ-ի դիմաց՝ ի աջակցություն եկեղեցու միջադեպով ձերբակալված դպրոցականների։

«Դպրոցում իմ տղայի համադասարանցին են եղել՝ առաջին դասարանից մինչև 9-րդ դասարան։ Նման օրինակելի, դաստիարակված, հայրենասեր, քրիստոնյա, նման մարդ Հայաստանի Հանրապետությունում դժվար է գտնել։ Նման մարդիկ պետք է մեր ապագան կերտեն, ոչ թե տանել ու ինչ-որ հոդվածներ դնել»,- այս մասին ՆԳՆ-ի դիմաց լրագրողների հետ զրույցում ասաց Նիկոլ Աղբալյանի անվան դպրոցի ծնողը՝ անդրաադառնալով երեկ Սուրբ Աննա եկեղեցու բակում տեղի ունեցած միջադեպին։

«Ե՛վ Միքայելը, և՛ Դավիթն առանձնահատուկ ունակությունների տեր մարդիկ են, որոնց առաջին, 3-րդ, 4-րդ դասարաններում իրենց կյանքի միակ նպատակը՝ լավ սովորելն է, լավ մարդ ու հայրենիքին պիտանի մարդ դառնալը։ Դուք պետք է այդ երեխեքին տեսնեիք Ղարաբաղյան պատերազմի օրերին։ Մարդիկ, լուրջ եմ ասում, հոգեկան տրավմաներ էին ստանում։ Հայրենասեր, քրիստոնյա մարդիկ։ Շա՞տ եք տեսել 10- 12-րդ դասարանի տղաներն ամեն կիրակի գնան եկեղեցի՝ պատարագի։ Իրանք գնում են։

Ես 2 օր է չեմ կարողանում ուշքի գալ։ Խնդրում եմ՝ թող ինչ-որ մի պաշտոնյա, թեկուզ հենց Լուսնե Բադալյանը, որ այդպես գրում է, թող մի  հանդիպում կազմակերպի և գնա Միքայելի,Դավիթի հետ զրուցի, իր բոբիկ վիճակից ամոթով հետ կդառնա։ Լուրջ եմ ասում՝ այդ երեխաներն արժանի են լավագույնին»,- հավելեց ծնողը։

Ծնողը  կարծում է , որ տեղի ունեցածն ինչ-որ անկանոն շարժման հետևանքով է։

«Թիկնապահները հրելով Դավիթի ծնոտին էին խփել։   9 տարի սովորել է դպրոցում ու ոչ մի օր որևէ ուսուցչի պատասխանած չկա, հասկանո՞ւմ եք, ինչ-որ կոնֆլիկտ արած չկա։ Այդ դասարանի երևի «խաղաղության աղավնիներն» են այդ տղաները։Ես իմ բոլոր բառերի տակ ստորագրում եմ»,- եզրափակեց բողքի մասնակից ծնողը։

Ավելի մանրամասն՝ տեսանյութում։
Աղբյուրը` Panorama.am