Անվտանգայինից զատ մեր հանրության մի ստվար հատվածի հետաքրքրում է նաև հացի խնդիրը․ Արեգնազ Մանուկյան (տեսանյութ)
«Մայր Հայաստան» կուսակցության վարչության անդամ Արեգնազ Մանուկյանի խոսքն «Առաջարկ Հայաստանին» համակարգող խորհրդի առաջին նիստում․
Հայաստանը կանգնած է գոյաբանական խնդիրների առաջ: Դրանք առնչվում են ինչպես մեր երկրի անվտանգությանը, այնպես էլ սոցիալ-տնտեսական խնդիրներին:
Անվտանգային հարցերի մասին խոսվել է ու էլի է խոսվելու, բայց դրանցից զատ մեր հանրության մի ստվար հատվածի, լայն իմաստով, հետաքրքրում է նաև հացի խնդիրը: Եվ դա բնական է, քանի որ պաշտոնապես մեր երկրում աղքատ է բնակչության ամեն հինգերորդը: Ոչ պաշտոնական թվերն ավելի տխուր պատկեր են տալիս:
Դժվար է մարդկանցից հայրենասիրություն և քաղաքացիական դիրքորոշում պահանջել, երբ բազմաթիվ ընտանիքներում օրհասական են ուսմանը, օրվա ապրուստին, բուժմանը վերաբերող հարցերը:
Օրվա իշխանությունները 2018-ին խոստացան սոցիալական արդարություն: Խոստացան աղքատության կրճատում, ներդրումների աճ: Խոստացան ու չկատարեցին՝ ձեռքի հետ էլ իրենց իշխանության բերածներին մեղադրելով, որ աղքատությունը նրանց գլուխներում է:
Այս ցինիկ հայտարարություններին զուգահեռ մարդիկ տեսան, թե ինչպես են իշխանավորները շատ արագ հարստանում ու հաղթահարում աղքատությունն իրենց գրպաններում:
«Առաջարկ Հայաստանին» ծրագիրն առանձնանում է նրանով, որ հանրության լայն շրջանակներին հետաքրքրող լուծումներ է ներկայացնում: Սկսած թոշակառուներից, վերջացրած բիզնեսի բոլոր շերտերով, սկսած գյուղատնտեսությամբ զբաղվողներից մինչև սահմանը պահող զինվորականներ, սկսած ուսուցչից, մինչև վարկերի տակ ճռռացող մարդիկ այս ծրագրում կգտնեն իրենց հուզող հարցերի պատասխանները:
Մեր խնդիրը պետք է լինի ստեղծված իրավիճակը փոխելը, նոր իշխանություն ձևավորելը, Հայաստանի համար երաշխավորված խաղաղություն, ներառական տնտեսական աճ և բարեկեցություն ապահովելը:
Ես համոզված եմ, որ միասնական ջանքերով մենք հաջողելու ենք:
Հետևեք մեզ Facebook-ում