Դոնի Ռոստովում տեղի է ունեցել ակցիա՝ ի պաշտպանություն Հայ առաքելական եկեղեցու

Ռուսաստանի Դոնի Ռոստով քաղաքում տեղի է ունեցել բազմամարդ ակցիա՝ ի պաշտպանություն Հայ Առաքելական եկեղեցու և Ամենայն Հայոց Կաթողիկոս Գարեգին Բ-ի։ Այս մասին հայտնում է «Взгляд» թերթը։

Սուրբ Խաչ եկեղեցու հոգևոր հովիվ Հարություն Տերտերյանն ասել է, որ հայկական սփյուռքը հետևում է Հայաստանում տեղի ունեցող իրադարձություններին, որոնք նա որակել է որպես եկեղեցու դեմ հալածանք։ Նրա խոսքով, ՀԱԵ-ի հոգևորականների համար կարևոր է նման պահին հավատացյալներին աջակցելը։

«Հատկապես կարևոր է, որ միջոցառումը տեղի ունեցավ այն օրը, երբ մեր եկեղեցին նշում է Ծաղկազարդը։ Այն, ինչ հիմա կատարվում է Հայաստանում, երբ կալանավորված են չորս արքեպիսկոպոսներ, այլ կերպ չի կարելի անվանել, քան հալածանք երկրի իշխանությունների կողմից։ Իհարկե, մենք քաղաքական կարգախոսներ չհնչեցրինք, բայց ծխականները լսեցին՝ մենք նրանց հետ ենք»,- ասել է Սուրբ Խաչ եկեղեցու առաջնորդ Հարություն Տերտերյանը։

Նրա գնահատականներով՝ հանրահավաքին մասնակցել է առնվազն 1500 մարդ։

Բեմից ներկաներին դիմել են տեղի պատգամավորներ, քահանաներ, ելույթ են ունեցել նաև ստեղծագործական խմբեր՝ ի աջակցություն եկեղեցու ու հոգևորականների։

Աղբյուրը` Panorama.am