Մահացել է Ալբերտ Մկրտչյանը

Այսօր՝ փետրվարի 28-ի առավոտյան, մահացել է հայտնի ռեժիսոր, սցենարիստ, դերասան, ՀՀ ժողովրդական արտիստ Ալբերտ Մկրտչյանը: Նա հայտնի ԽՍՀՄ Ժողովրդական արտիստ Մհեր Մկրտչյանի (Ֆրունզիկ) եղբայրն էր:

Ռեժիսորը 81-ամյակը բոլորել է երեկ՝ փետրվարի 27-ին:

Ալբերտ Մկրտչյանը ծնվել է Լենինականում (այժմ՝ Գյումրի):

1960թ. ավարտել է Երևանի գեղարվեստաթատերական ինստիտուտի դերասանական, 1971թ.` Մոսկվայի կինեմատոգրաֆիայի ինստիտուտի ռեժիսորական ֆակուլտետները: 1960-66թթ եղել է հայկական հեռուստաստուդիայի, 1971թ-ից` «Հայֆիլմ» կինոստուդիայի ռեժիսոր, 1995-99թթ` Գյումրիի Վ.Աճեմյանի անվան պետական դրամատիկական թատրոնի, 2003-15թթ` Երևանի «Մհեր Մկրտչյան» արտիստական թատրոնի տնօրենն ու գեղարվեստական ղեկավարը:

1980-2001թթ դասավանդել է Երևանի Խ.Աբովյանի անվան հայկական պետական մանկավարժական համալսարանում (1995թ-ից` պրոֆեսոր), 2001թ-ից` Երևանի թատրոնի և կինոյի պետական ինստիտուտում: Որպես ռեժիսոր հանդես է եկել հետևյալ ֆիլմերում` «Հուշարձան» (1971թ.), «Կյանքի լավագույն կեսը» (1979թ., ՀՀ Պետական մրցանակ), «Հին օրերի երգը» (1982թ.), «Մեր մանկության տանգոն» (1985թ., երկուսն էլ` ՀՀ Պետական մրցանակ), «Ուրախ ավտոբուս» (2000թ., ՀՀ Պետական մրցանակ), «Տխուր փողոցի լուսաբացը» (2008թ.) և այլն:

Թատրոնում բեմադրել է Կ.Գոլդոնիի «Երկու տիրոջ ծառան», «Ավերված քաղաքի մեղեդին», Գ.Մարկեսի «Սիրային նախատինք բազկաթոռին նստած ամուսնուն» և այլ պիեսներ:

2000թ. պարգևատրվել է ՀՀ «Մովսես Խորենացի», 2007թ.` ՀՀ մշակույթի նախարարության ոսկե մեդալներով: 2003թ. արժանացել է Հայաստանի ժողովրդական արտիստի կոչման, 2012թ.՝ «Հայակ» հայկական ամենամյա առաջին կինոմրցանակաբաշխության Հատուկ մրցանակի:

Մահացել է Երևանում: