Կասկածելի միլիոններ՝ Թրամփի գրառումից րոպեներ առաջ. Ինսայդերական առևտրի սկանդալ

Առեղծվածային թրեյդերները հնարավոր է տասնյակ միլիոնավոր դոլարների շահույթ են ստացել ընդամենը մի քանի րոպեում՝ օգտագործելով Դոնալդ Թրամփի՝ Իրանի վերաբերյալ սենսացիոն հայտարարությունը։ Այս մասին գրում է Daily Mail-ը։

Երկուշաբթի առավոտյան, ԱՄՆ նախագահի կողմից Truth Social հարթակում Իրանի հետ «արդյունավետ բանակցությունների» մասին գրառումից ընդամենը 15 րոպե առաջ շուկայում նկատվել են նավթի և բաժնետոմսերի հսկայական խաղադրույքներ։ Սա առաջացրել է կոռուպցիայի և ինսայդերական առևտրի (ներքին տեղեկատվության ապօրինի օգտագործման) վերաբերյալ մեղադրանքների ալիք Ատլանտյան օվկիանոսի երկու ափերին։

Մինչ Թրամփի հայտարարությունը, համաշխարհային շուկաներում տիրում էր լարվածություն. Մերձավոր Արևելքում հակամարտության սրման վախով պայմանավորված՝ նավթի գները աճում էին, իսկ ֆոնդային բորսաները՝ անկում ապրում։